Mikel Arruti: "Herriak esan digu bide onetik goazela"
Lezoko alkate izango denak eskerrak eman dizkie lezoarrei eman dieten konfiantzagatik. Hunkituta hitz egin du.
Lezoko EH Bilduko zerrendakideak, eta zaleak, gaur garaipena ospatzen. Oso pozik. Hunkituta. Hala hitz egin du hedabide honekin Mikel Arruti Salaberriak, Lezoko hauteskundeak irabazi dituen EH Bilduren zerrendaburu, eta datozen lau urteetan herriko alkate izango denak. Zazpi zinegotzi, 2019an baino bat gehiago. Gehiengo osoa lortu dute. “Oso pozik gaude. Orain arte egindako lanarekin, bidearekin, eta horrek ekarri duen emaitzarekin. Herriak esan digu bide onetik goazela, eta horrela jarraitu behar dugula lanean”.
Ospakizun betean zela hitz egin du ekainaren 17tik aurrera alkate izango denak HITZArekin. Apal lanean hasiko direla adierazi du, “jarrera irekiarekin, jende guztiarekin hitz eginez, eta proposamenak egiten. Baina beti apaltasunetik. Hori azaldu dugu orain arteko bidean. Hori da gure lan egiteko modua. Herritarrek ulertu dute esan nahi geniena”.
“Gertutasuna, jendearekin egon, eta konfiantza sentiarazi. Horiek izan dira gure oinarriak. Herritarrekin aurrera atera nahi dugu gure proiektua. Haiekin batera egin nahi dugu herria”, azaldu du Arrutik.
