Pasaiako hautetsontziak, geroz eta beteago
Boza emateko eskubideak —eta eguzkiak— Pasaiako kaleak barra-barra ditu. Gorabeherarik ez, oraingoz, herriko zortzi hauteslekuetan.
Antxoko Kultur Etxeko hauteslekua. 
Nabari da eguzkia irten dela. Barra-barra daude Pasaiako terrazak, baina ohi baino joan-etorri handiagoa nabari da baita kaleetan ere, bozkatzeko eguna baita. Herriko zortzi hauteslekuetan, aparteko gorabeherarik ez.
Mahaiak egoki osatu dira goizeko 09:00etan bozkalekuen ateak zabaldu dituztenerako. Bertako herritarrek adierazitakoaren arabera, bizilagunak alai eta bromazale bertaratzen ari dira —eguraldiak, jakina, izango du zerikusia horretan ere— eta orokorrean gogotsu somatu dituzte. Hain da horrela, non baten bat 08:45erako jadanik zain zuten atean, boz eskubidea egikaritzeko presaz.
Ohikoa den bezala, mahai batzuk ordezkoekin osatu behar izan dituzte, titularrak agertu ez edo beranduegi heldu direlako. Bestelakoan, arazorik ez herriko hauteslekuetan; zabalik izango dira horiek 20:00ak arte. 15:00ak inguruan emango ditu hedabide honek Pasaiako lehen parte-hartze datuak.
