Gure Eskuk Tourreko ekintzaren spota errodatuko du asteazkenean
Uztaileko lehen hiru egunetan Frantziako Tourrean erabakitzeko eskubidearen aldeko mezua zabalduko dute. Spota grabatzera animatu dute.
Pasa den astean 'Euskal Herria, Mundura' aurkezteko Baionan egin zuten agerraldia [www.gureesku.eus]. Gure Eskuk iragarria du Frantziako Tourra Euskal Herritik pasatzea aprobetxatuko duela erabakitzeko eskubidearen aldeko aldarria lau haizetara zabaltzeko.
Uztailaren 1, 2 eta 3an munduko txirrindularitza lasterketan ikurrina erraldoia zabaldu nahi dute, inoiz egin den handiena. Euskal Herriak, erabaki leloa eramango du, euskaraz eta ingelesez. Euskal Herria, mundura kanpainaren barruko ekintza izango da.
Ekintza hori iragartzeko spota Oiartzunen errodatuko dute, bihar —asteazkena, hilak 31— arratsaldean. 18:00etan izango da, Oiartzungo plazan, eta Porrotx pailazoarekin batera ikurrinak marraztuko dituztela iragarri du Gure Eskuk.
Herritarrak Done Eztebe plazara hurbiltzera animatu dituzte, iragarkiaren errodajean parte hartzeko.
Bestalde, ikurrin erraldoi horri ekarpena egiteko bi modu daudela gogorarazi dute. Alde batetik, Itsulapiko bidez, edo 644 079 065 telefono zenbakira Whatsapp bidez idatziz.
