Gasteizko hilketa matxista Trintxerpe eta Antxon arbuiatuko dute
Urte hasieratik zekien Ertzaintzak ustezko hiltzailea urruntze agindua urratzen ari zela. Gernika eta Biterin elkartuko dira pasaitarrak.
Orioko hilketa matxistagatiko elkarretaratzea, Antxon. 
Igandean, jendartea datozen urteotako errealitatea zer-nolakoa izango den aztertzen ari zen bitartean, gizarteko esparru guztiak zeharkatzen dituen beste errealitate gordin batek jendartea kolpatu zuen berriro ere. Aurten indarkeria matxistak Euskal Herrian utziriko bigarren biktimaren gorpua antzeman zuten Gaistezko apartamentu hotel batean.
32 urte zituen Maialen Mazonek, haurdun zegoen, eta hiru urteko ume bat zuen, zeina amaren gorpuaren alboan topatu zuen Ertzaintzak igandean. Polizia horrek urtarriletik zekien ustezko hiltzailea ezarrita zuen urruntze agindua urratzen ari zela. Josu Erkoreka Eusko Jaurlaritzako Segurtasun sailburuak adierazi duenaren arabera, hilaren 18tik ari ziren ertzainak biktimak zenbateko arriskua zuen “aztertzen”.
Hilabete honetako bigarren elkarretaratzea egingo dute pasaitarrek gaur bertan (Orioko hilketa matxistagatik elkartu ziren orain bi aste Antxo eta Trintxerpen). Herriko talde feministek Biteri eta Gernika plazetan bat egitera deitu dituzte berriro bizilagunak; 19:00etan izango da elkarretaratzea Antxon eta 19:30ean, berriz, Trintxerpen.
