Loreto Osa: "Bihotzez eskertzen dugu gure hautagaitzan jarritako konfiantza"
Lortutako emaitzen gaineko balorazio baikorra egin du Loreto Osa zerrendaburu jeltzaleak. Hura ere kezkatuta du abstentzio tasa altuak.
Loreto Osa Ocon. 
Pasaiako Euzko Alderdi Jeltzaleak (EAJ) hauteskundeen emaitzen balorazioa egin du. 2019tik hona 223 boto-emaile galdu badituzte ere, PSE-EEren gainbeheragatik bigarren indar da orain Loreto Osa Ocon buru duen zerrenda, eta zinegotzi kopurua lauan mantentzea lortu dute jeltzaleek.
Hori horrela, esker onez mintzatu zaie Osa babesa adierazi dietenei: “Bihotzez eskertzen dugu gure hautagaitzan jarritako konfiantza”. Pasaiako bigarren indarrak herriko talde politiko guztiekin harremanetan jartzeko konpromisoa hartu du, “elkarguneak bilatu” eta programak mahai gainean jarrita akordioak lotzeko.
Herriko indar nagusi EH Bildu zoriontzeko tartea ere hartu du eledun jeltzaleak. Ez haiek bakarrik, baita udalbatza berria osatuko duten beste bi alderdiak ere, PSE-EE eta Ahal Dugu-Aliantza Berdea.
Atzera begira, asebete
Legegintzaldi berriari atzera begirakoa eginda ekin nahi izan dio Osak. “Pozik gaude urte hauetan egindako lanarekin”, mintzatu da, “Pasaiak hobera egin du nabarmen azken lau urteetan, aurrera egin du eta Pasaiaren alde lanean jarraitzeko konpromisoa hartzen dugu, udalerri hobea izan dadin”.
Zerrenda osatu duten alderdien programa gehienetan errepikatzen dira proiektu nagusietako asko, eta horrek akordioetarako aukerak ekarriko dituela sinetsita dago Osa. “Programa horiek ahalik eta babes handienarekin garatzea espero dugu, guztiok Pasaia hobe baten alde eta etorkizunera begira lan egin dezagun”, mintzatu da.
Aurretik Teo Alberro eta Julen Rodriguezek egin bezala, Osak ere kezka ageriko egin du herriko abstentzio tasa altuari erreparatuta (%46,5). “Balorazio sakona” egiteko garaia dela uste du. “Demokrazian sinesten duen alderdia gara, eta abstentzio altuak alderdi politiko guztiak sakon hausnartzera eraman behar gaituela uste dut”.
EAJren boto-emaileei eta, orobat, pasaitar guztiei zuzendu zaie jeltzalea bukatzeko. “Eskerrik asko gugan konfiantza izan duzuen guztioi. Pasaiako emaitzek gure udalerriaren aniztasuna erakusten dute, eta aniztasun hori kontuan hartu behar da eta errespetatu egin behar da, gure alderditik egiten dugun eta egingo dugun bezala. Orain arte egin dugun bezala, Pasaia hobe baten alde lanean jarraitzeko konpromisoa hartzen dugu, ongizatea bultzatuz eta pertsonak erdigunean jarriz, etxebizitza eta enplegu aukera berriekin, modu eraikitzailean lan eginez”.
