Mugimendu feminista: "Autodefentsarako deia egiten dugu"
Maialen Mazonen hilketa matxista salatzeko elkarretaratzea egin dute plazan. "Nazkatuta" daudela argi utzi nahi izan dute.
Igandean indarkeria matxistak bigarren hildakoa utzi zuen Euskal Herrian: haurdun zegoen Maialen Mazon 32 urteko gasteiztarra. Bere bikotekide ohia da susmagarria; Mazonen hilotza aurkitu zutenean, bere 3 urteko semea zegoen.
Hilketa hori salatzeko, Oiartzungo Feministen Asanbladak elkarretaratzea deitu zuen atzo arratserako. Hamarnaka lagun elkartu ziren plazan, hilketa matxista “gogor” salatzeko.
Kasu horrek “indarkeria patriarkalaren hainbat dimentsio” izan dituela nabarmendu zuten, umeak zuzenean jasotzen dutelako indarkeria. “Maialen ez ezik, bere haurra ere indarkeria matxistaren zuzeneko biktima da”, esan dute.
Gogorarazi dutenez, Valentzian bizi zen Mazon, eta “muturreko arriskuko biktima” bezala izendatuta zegoen erkidego horretan. Hala ere, Euskal Herrira bueltatu zen astean, Ertzaintzak “oinarrizko biktima” kategoria ezarri zion.
“Epaitegiari eta Ertzaintzari eskatzen diegu zergatik ez zioten Maialeni muturreko arriskuko biktima izaera mantendu”, galdetu zuten. “Beste behin ere, agerian geratzen dira haien mugak eta indarkeria
matxistarekin behingoz amaitzeko estrategia integral oso baten falta dutela”.
“Nazkatuta gaude”
Mazonen familia eta lagunei samin eta elkartasuna adierazi zieten, eta “nazkatuta” daudela “ozen” oihukatu nahi dutela adierazi.
“Indarkeria matxista ahalbidetzen dituzten jarrera konplize guztiekin amaitzea eta erasotzaileei aurre egitea jendarte osoaren ardura izan behar du”, gaineratu zuten.
“Urrats handiagoak” eskatu zituzten, eta indarkeria matxista ez dela bukatuko “gizartearen matxismoarekin” amaitu arte.
“Euskal Herriko mugimendu feministatik indarkeriarik gabeko bizitza izateko eskubidea aldarrikatzen
jarraituko dugu. Nazkatuta eta batzuetan nekatuta egon arren, badakigu borrokatzen eta kalera irteten jarraitzea
besterik ez dugula”.
Beraien esanetan, feminismoa da “gizartea errotik aldatuko” duen bidea, eta autodefentsarako deia egin zuten. “Bizitza bizigarrien aldeko apustu erradikal bat egiten dugu, matxismorik, indarkeriarik, arrazakeriarik eta gorrotorik gabea”.
