Madalenetako laguntzaileak hautatzeko deialdia, zabalik
Laguntzaileek uztailaren 21etik 25era egingo dute lan. Zerrenda hori, Atlantikaldirako ere erabiliko du udalak.
Madalenetako laguntzaileak hautatzeko deialdian izena emateko epea zabaldu du udalak. Utzailaren 21etik 25era egin beharko dute lan hautatuek, baino gainera, zerrenda hori, Atlantikaldirako ere erabiliko dela jakinarazi dute.
Izena emateko, 18 urte beteak edukitzea ezinbestekoa da kontratuaren hasierako datan, baita langabea izatea ere. Eskola ziurtagiria edota maila altuagoko titulazio akademikoa beharrezkoa da gainera, hautaketa prozesuan parte hartzeko, baita euskaraz elkarrizketa bat izateko gai izatea ere. Eskakizun horrekin lotuta, hautatzen dituzten pertsonak deituko dituzte udal euskaltegian elkarrizketa bat edukitzeko. Bigarren Hizkuntz Eskakizuna edota 2011 eta 2022 urteen arteko deialdian helburu bererako eginiko euskara froga gainditu zutenek ez dute egin beharko.
Lanpostuari dagozkion eginkizunak betetzeko gaitasun funtzionala izatea, diziplina espedientea dela medio, Espainiako Estatuko, Autonomi Elkarteko nahiz udal erakundeen menpeko lanetik banandu ez izana, ezta ere herri eginkizunetan aritzeko, edota indarrean dagoen araudiaren arabera legezko ezgaitasun edo bateraezintasun kasuren batean ez egotea betebeharreko baldintzak izango dira.
Hautatzeko irizpideak
Errenteria-Oreretan gutxienez hiru hilabete erroldatuta daramatenek lehentasuna izango dute hautatze prozesuan. Zozketa hilaren 23an egingo dute eta emaitza udalaren web orrian, eta iragarki oholtzan publikatuko dute. Euskara maila egiaztatuta ez duten hautatukoek hizkuntza probak egin beharko dituzte, eta deitu egingo dituzte horretarako (hilaren 30ean egitea aurreikusia dago).
Eskaera Zu! arreta zerbitzuan aurkeztu beharko dute interesdunek, Nortasun agiriaren, titulu akademikoaren eta daukatenen kasuan, euskarako tituluaren fotokopiarekin batera, hilaren 1etik 15era. Zozketan hautatuak izan diren pertsonei eta lehenengo 10 ordezkoei e-posta bidaliko diete beharrezko informazio guztiarekin. Ezinbestekoa da, hortaz, hautagaiak eskaera orrian bertan bere e-maila garbi adieraztea.
Kontratatzen dituzten pertsonek utzailaren 19an 09:00etan Reina Aretoan (Xenpelar kalea, 3) egingo den bilerara joan beharko dute. Bertan egin beharreko lanaren gaineko argibideak jasoko dituzte.
