Patagonia arropa markak Albaolan aurkeztuko du kanpaina berria
Aurkezpen ekitaldia hilaren 9an izango da, San Pedroko faktorian. Jardunaldia doakoa eta irekia da, baina sarrera aurrez erreserbatu behar da.
Patagonia marka. 
Patagonia arropa markak Gipuzkoa aukeratu du aurten, eta zehazki Albaola (Pasai San Pedro), ozeanoak babesteko diseinatu duen nazioarteko kanpaina berria aurkezteko. Ozeanoen Munduko Astearekin bat eginez, hilaren 9an (ostirala) izango da jardunaldia, San Pedroko faktorian.
Solasaldi eta proiekzio programa zabala prestatu dutela aurreratu dute Patagoniako kideek, eta zuzeneko musikak ere ez du hitsik egingo. Arratsaldea “pentsamendu kritikoz, eztabaidaz, filmez, gozamenez eta konexioz” beterikoa izango dela aurreratu dute.
Ateak 18:00etan zabalduko ditu ontziolak, bertako instalazioetan barrena egingo duten bisita gidatuarekin. Hala, San Juan baleontziaren eraikuntzaren azken fasea bertatik bertara ezagutzeaz gain, erabateko murgiltze esperientzia biziko dute bisitariek, Sounds of the Ocean taldeak itsasoko irudi eta soinuak birsortuko dituenez gero.
Eztabaida eta zinema saioa 19:15ean hasiko da. Ozeanoak zaintzen ibilbide luzea atzean duten erakundeak izango dira protagonista tarte horretan, hala nola Oceana, Ricardo Aguilarren presentziarekin, edo Bloom GKE frantsesa, Claire Nouvian fundatzailearekin. Mahai inguru horiek lau filmekin tartekatuko dira: L ‘arte Dell Attivismo (Italia), The love of the sea (Gales), The Custodians (Eskozia) eta Mae Mar (Portugal).
21:00etatik aurrera, Albaolaren terraza berrian, Javi Pez donostiarraren musikaz eta Siglas taldearen kontzertuaz gozatzeko aukera izango dute bisitariek.
Ekitaldia doakoa eta edonori irekia izango da, baina beharrezkoa izango da aldez aurretik gonbidapena erreserbatzea. Horretarako esteka honetan klik egin dezakezu.
