Giriziaren pala txapelketak baditu irabazleak
Hirugarren Mailako finalean, Oiartzungo bikoteak ezin izan du txapela jantzi. Bigarren Mailan sorpresa handia izan da.
Finala jokatu zuten pilotariak, Ander Imaz eta Unax Landa pilotariak, udaleko zein Giriziako ordezkaritzarekin. Pasa den larunbatean —hilak 3— jokatu zituzten Madalensoron Euskal Herriko Pala Txapelketa Irekiko finalak. Emakumeen txapelketako zein gizonen hiru kategorietako finalak jokatu zituzten. Girizia elkarteak antolatzen duen txapelketaren XXXIX. ekitaldia izan da.
Emakumeen arteko finalean, Karrera eta Murua dira txapeldun berriak, Mendizabal eta Aizpururi 25-22 irabazi ondoren.
Gizonen kategorietan, berriz, Oiartzungo bikote batek txapela eramateko aukera izan zuen. Markos eta Bereziartua ongi hasi ziren, baina bukaeran ez zuten berea eman. Arregi eta Etxebeste dira Hirugarren Mailako txapeldunak, 25-15 irabazita.
Bigarren Mailan, Luixa eta Conde bi tantogatik nagusitu ziren. Berho eta Merindano nafarrak 21-10 aurreratu ziren, baina ez ziren partida ixteko gai izan.
Lehen Mailako finalean, partida erdira arte joko orekatua izan zen nagusi. Loidi eta Dagerrek fisiko hobea erakutsi zuten, eta Antxordoki eta Martikorenari 25-17 gailendu zitzaizkien.
Finalak giro onarekin jokatu zituzten, eta garaikurrak banatzerako garaian, finalistek ez ezik, Antton Toledo epaileak ere aitortza jaso zuen.
Sari banaketan, Udaleko eta Giriziako ordezkariak eta Ander Imaz eta Unax Landa pilotariak izan ziren.
