Kalean Ehuntzeko Munduko Egunarekin bat egingo dute San Pedron
Larunbat goizean San Pedroko frontoiaren ondoan bat egingo dute herriko ehuntze taldeko emakumeek, 'Kaleak gureak dira' lelopean.
Haiek apainduriko zuhaitzaren alboan egingo dute bat larunbatean. 
Larunbat honetan, hilak 10, Kalean Ehuntzeko Munduko Egunarekin bat egingo dute pasaitarrek. Udaleko Berdintasun Sailak aditzera emandakoaren arabera, Euskal Herriko 11 puntutan “kalearen konkista” aldarrikatuko dute Kaleak gureak dira lelopean.
Jardueraren helburuen artean daude ehuntzearen artea aldarrikapen feministarako tresna bihurtzea; eremu publikora ateratzea emakumeei eta eremu pribatuari lotuta egon izan diren diziplinak; hurbiltasuneko harreman afektiboak aintzatestea; eta lanen atzean dagoen jakinduria guztia ikusaraztea, “eta gure arbasoek itzalean egindako lanaren balio kalkulaezina ohoratzea”.
Iniziatiba 2021ean jaio zen Pasaian, bi lagunen arteko ekimenetik, Lalocadelacasa markaren atzean dagoen Oihana Merino eta Adinkide GKEko Blanca Caballero izan ziren ideiaren abiarazleak, eta saiakerak forma hartu zuen Matazak Indarkeria Sexistaren Kontra proiektuko Isabel Oterorekin harremanetan jarri zirenean.
Ekimen honetan parte hartzen duen Pasaiako emakume taldea San Pedroko frontoiaren ondoan elkartuko da larunbatean, 10:00etatik 13:00etara. Taldeak apaindutako zuhaitzaren [argazkian] azpian kokatuko dira, eta ohartarazi dute osatutako lanak nahiz abian dituzten proiektuak erakusteaz gain, hala nahi duenari ehuntzen ikasteko oinarrizko jarraibideak emango dizkiotela.
