[Argazki galeria] Jostakeitanen azken saioan, plisti-plasta
Jostakeitanen ikasturteko laugarren eta azken saioa egin zuten atzo. Beroari aurre egiteko formula egokia hautatu zuten: giro ona eta ura.
Atzo egin zuten Jostakeitan egitasmoaren sasoiko laugarren eta azken topaketa, Goiko Plazan. 17:00etan eta 18:00etan egin zituzten bi multzoetako jarduerak, adin tarteka banatuta. Egun sargoria, beroa izan zen atzokoa. Txirbilla Aisialdi Taldeko kideek bazuten plan bat horri aurre egiteko: giro ona ezartzea, urarekin. Ur jolasetan aritu ziren herriko haurrak, euskaraz, familia giroan, eta kalean.
Atzokoaz aparte, maiatzaren 10, 17 eta 31n egin zituzten aurreko saioak. Beti izan dira jendetsuak, bereziki atzokoa. Beraz, 2024an ere egitasmoari eusteko gogoz daude sustatzaileak.
Euskara Talaia, Txirbilla Aisia Taldea, Lezo Herri Eskola, Hezikuntza Guraso Elkartea, eta Lezoko Udala izan dira egitasmoaren bultzatzaileak. Hala, Euskara Talaiak ikasturtean zehar egiten dituen jardueren jarraipena da Jostakeitan, kurtsoaren bukaera aldera egin ohi dena. Txirbillakoek dinamizatu dituzte saioak.