Xoxolur Eguna, hilaren 18an
Xoxolur Mendi Klubak ikasturteko azken jarduera herrian egingo du: Jaizkibeldik mendi buelta eta bazkaria dira eguneko mugarriak.
Ikasturteko bederatzigarren eta azken proposamena landu du Xoxolur Mendi Klubak hilaren 18rako (igandea). Xoxolur Eguna egingo dute, herrian. Nola ez, mendizaleen asmoa da txangoa egitea, baina osagai gehiago erantsiko dizkiote egunari, tartean herri bazkaria delarik. Ez dira urrunera joango: irteera Jaizkibelera egingo dute, eta bazkaria Tiñelun. Erne: Xalto pailazoak ere parte hartuko txangoan, beraz, ohiko duten gozamena areagotuko da.
Bi jardueretarako izena eman behar da. Bi zerrenda jarri dituzte Orki tabernan: bat, txangoan parte hartu nahi dutenentzat; bestea, bazkarira joan nahi dutenentzat. Bietan izan nahi dutenek, bi zerrendetan jarri behar dute euren izena beraz. Txangorako ez da ordaindu behar. Bai, ordea, bazkarirako: helduen menuaren prezioa 15 eurokoa da, eta gazteena 10ekoa. Hilaren 14an (asteazkena) kenduko dituzte zerrenda horiek Orkitik. Mendizaleen posta elektronikoa ere erabil daiteke izena emateko.
Honakoa da hilaren 18ko plana: 09:00etan elkartuko dira Gurutze Santuaren plazan; 2-3 orduko ibilaldia egingo dute Xalto pailazoarekin, tartean, Xoxolur gaina zapaltzea asmo dutelarik (motxila eramatea aholkatu dute, urarekin eta hamaiketakoarekin); herrira jaitsiko dira, Tiñelu elkartean bazkaltzera; ondoren, izan diren herri guztietan egin bezala, jolasen txanda iritsiko da.
