San Joan suak egiteko baimena eskatu behar da Oiartzunen
Hilaren 23an kaleko suak egin nahi dituztenek hilaren 16ra arteko epea dute baimena eskatzeko. Udaltzainak arduratuko dira segurtasuna bermatzeaz.
Hilaren 23ko San Joan Eguneko bezperako suak eremu publikoan egiteko baimena eskatu behar da. Ospakizun berezia izaten da urteko egunik luzeenaren eta gaurik motzenaren artekoa, eta kalera atera ohi dira auzoz auzo herritarrak. Suek, ordea, segurtasun irizpideak bete behar dituzte. Horri begirakoa da baimen eskaera: inguruaren eta pertsonen segurtasuna bermatzeko egingo diren suen berri izan behar du udalak. Baimen eskaerak egiteko epea hilaren 16ra artekoa (barne) da, eta esan bezala, eremu publikoan egitekoak diren suentzako dira; eremu pribatuan egingo direnen kasuan udalari jakinarazpena besterik ez zaio bidali behar.
Bai baimen eskaerak (eremu publikorako) zein notifikazioak (eremu pribatuetarako) udaletxean aurkeztu behar dituzte interesdunek. Online aukera ere zabalik da. Besteak beste, eskatzailearen datu pertsonalak eta sua non egingo den dira aitortu beharrekoak.
Edonola ere, Oiartzungo Udaltzaingoa arduratuko da suak egokiak direla ziurtatzeaz. Hainbat aldagai hartuko dituzte kontuan: suaren pila ez da hiru metro baino handiagoa izan behar; gai solidoak erre behar dira bakarrik; ke handia sortzen duten edo toxikoak diren materialak ezin dira erre; eraikin, linea elektriko, instalazio, altzari edo ibilgailuekiko gutxienez 15 metroko distantziara egon behar dute suek, eta horiek ezin dira urbanizatutako zoladuraren gainean egin.
Informazio gehiago nahi duenak Udaltzaingora dei dezala: 943 49 33 11.
