Sanpedroetako haurren danborradarako izen-emateak, asteazkenean
Hilaren 14an Ertin eman ahalko dute izena familiek, 2 euroren truke. Danborrada prestatzeko entseguen hitzorduak ere iragarri dituzte jada.
San Pedroko Jaietako haurren danborradako artxiboko irudia. 
Geroz eta gertuago dira San Pedroko Jaiak. Hilaren 28an hasi eta asteburua bukatu bitarte luzatuko dira, eta beraz, egun horietan herrian izango diren jarduerak antolatzen buru-belarri ari da barrutiko jai batzordea.
Egitarauaren berri datozen egunotan emango du HITZAk, baina badira aurrera daitezkeen hitzorduak. Artean, urteroko haurren danborrada. Kalejira musikatu horretan parte hartu nahi dutenek datorren asteazkenean, hilak 14, eman beharko dute izena. Horretarako Ertira gerturatu beharko dira familia interesdunak, 17:00etatik 18:00etara bitarteko tartean, eta 2 euro ordaindu beharko dituzte.
Danborradan parte hartuko duten haurrak hiru entsegutara daude deituta: hilaren 20, 22 eta 27an, 17:30ean. Parte hartu ahal izateko 4 urte baino gehiago eduki beharko dituzte haurrek.
