[Argazki galeria] Errebantxa hartu du Lezok herri kirolen desafioan
Duela bi aste Oiartzungo Sagardo Egunean joaneko desafioa egin ondoren, itzulikoa egin dute gaur Lezon, etxeko taldea nagusi izanik.
Duela bi aste Oiartzungo Sagardo Egunean joaneko herri kirolen desafioa egin ondoren, itzulikoa egin dute gaur Lezok eta Oiartzunek Lezoko Goiko plazan, Lezoko Sagardo Egunaren atarian. Eguraldia eta giro ona lagun, lezoarrak izan dira nagusi etxean, errebantxa hartu dute bi herrien arteko herri kirolen bigarren desafioan.
Oiartzunen bezalaxe, Lezok eta Oiartzunek zortzi laguneko talde bana osatu dute. Sei probari egin izan behar diote aurre: 12 jasoaldi harriari, lokotxak, hiru plaza txingekin, trontza, plaza bat gizon proban eta bost itzuli korrika. Lezoarrek formatua aldatu dute gaur, eta honakoa izan da planteamendua: hiru jokotan onena izatea, hau da, bi joko irabazten zituen taldeak irabaziko zuen herri kirolen desafioa. Joko bakoitza aurrez aipatutako sei probek osatu dute, eta Lezoko taldea lehen bietan nagusitu da, osotasunean 2-0 irabazita.
Kiroltasuna eta giro ona nabaria izan da bi herrien artean, eta desafioaren bukaeran talde argazkia atera dute. Ondoren, sagardoaren festaz gozatzera abiatu dira Goiko plazan bertaratutako guztiak.
