[Galeria eta bideoa] 11 sagardo eta ospatzeko hamaika arrazoi
Euskal Jaia giro paregabean ospatzen ari dira lezoarrak. XXIII. Sagardo Festa inauguratu du Piztu Lezok, jendetza inguruan.
Atseden hartzeko tarte gutxi izan dute gaur zerbitzariek. 
Arratsaldeko 18:00etan hasi da Lezoko XXIII. Sagardo Festa. Pozarren zeuden etxekoak, Lezo-Oiartzun herri kirol desafioaren itzulerako norgehiagokan nagusitu baitira, eta lehendik oiartzuarrek etxean lortutakoa berdintzea lortu dute horrela.
Oiartzundik etorritako bat baino gehiagok, dena dela, ezin izan du ekidin Euskal Jaiaren ospakizunera batzeko tentaldia. Bertako nahiz kanpokoen artean, hala bete dute Gurutze Santuaren plaza. Sagardo postuen eta sagardozaleen artean leporaino zegoen dute udaletxeko zabalgunea, eta lan makala bilakatu dute, jendetzak eta beroak, postu batetik bestera lekualdatze hutsa.
Aurkezpena Tiñelu elkarte antolatzaileak egin du hogeita hirugarrenez, baina Piztu Lezo izan da sagardoaren festa abiatu duena, elkarteko kideek hala erabakita. Dantzak lagunduta, postu bakoitzeko 11 sagardoak banan-banan aurkeztu dituzte urtero bezala oholtzan, eta hori eginda atera diete kortxoa lehen botilei.
Plazan zegoen jendea eta trago eta pintxoen prezioak kontuan izanda —edalontzia eta bi pintxo, hiru euro—, pentsatzekoa da berandu baino lehen agortuko dela sagardoa. Hori gertatu baino lehen edukiko dute aukera lezoarrek azken tragoa hartzeko, azken botilak hustear direnean Dantzazaleek Larrain dantza-ri ekingo baitiote plazan bertan, postuen itxieraren iragarle.
