Frantziako Tourrak eragingo dituen errepide mozketen berri eman udalak
Uztailaren 1ean Frantziako Tourra Euskal Herritik abiatuko da. Bigarren eta hirugarren etapak Oarsoaldetik igaroko dira. Pasaiako Udalak mozketen berri eman du.
Frantziako Tourraren bigarren etapako mapa. Iturria: Tour de France Uztailaren 1ean Bilbotik abiatuko da 2023ko Frantziako Tourra. Hurrengo egunean (uztailaren 2an) Gasteiztik irtengo dira txirrindulariak. Bigarren etapa horretan bertan Pasaiako errepidetan barrena egingo dute bidea txirrindulariek, zehazki, Pasai Donibaneko sarreraren eta Jaizkibelgo errepidearen (GI-3440) bidegurutzera helduko dira. Ondoren, Hondarribira heldutakoan itzulerako bidea egingo dute, Lezo eta Pasai Antxotik igaroz. Nafarroa etorbidetik Buenavista etorbidetik jarraitu eta Donostian amaituko dute erronka.
Uztailaren 3an ere Tourra ikusteko aukera izango dute bizilagunek; izan ere, Donostiatik abiatu eta Pasai Antxotik igaroko baita lasterketa. Aurreko egunean egingo duten bidearen kontrako norantzan. Kasu honetan baina, Errenteria-Oreretaruntz egingo dute bidea.
Egun horietarako hainbat gomendio luzatu ditu Pasaiako Udalak. Alde batetik, garraio publikoa erabiltzea gomendatu dute, batez ere trenbidekoa. Beste aldetik, Pasai Donibanetik irten nahi ez gero, Pasai San Pedro lotzen duen motora zerbitzua erabiltzea gomendatu dute.
Gainera, ezbeharrik gertatu ez gero, larrialdi zerbitzuetarako portu eremutik sarbide berezi bat prestatu dutela azaldu dute, soilik suhiltzaile, anbulantzi, polizia eta babes zibilaren erabilpenerako izango dena. Herrera eta Donibane artean ere larrialdietarako korridore bat ezarriko dute.
Uztailaren 2a
Donibane: Antolatzaileek aurreikusi dutenez, 15:10ean pasako da karabana Pasai Donibanetik. Lasterkariak, aldiz, 16:45tik 17:10era espero dira. Errepidea baina, 4 ordu lehenago itxiko dute. Hortaz, 12:00etatik 18:00etara Donibanerako sarbidea itxita egongo da.
Bestalde, Jaizkibelerako igoera 48 ordu lehenago itxiko da. Hala ere, bertakoentzat eta baimena dutenentzat zabalik egongo da, beti ere “behar den bezala identifikatuta badaude” jakinarazi du Pasaiako Udalak. Ziurtagiria Udaltzaingoan eskatu beharko dute.
Pasai Antxo: Nafarroa etorbideko irteerak itxita egongo dira 12:00etatik aurrera 18:00ak arte, gutxi gora behera. Barrutira sartu eta irteteko Oarso kaleko zubitik egin beharko da.
San Pedro eta Trintxerpe: Barrutiek ez dute GI-20ra bideratzeko arazorik izango. 12:00etatik 18:00etara, ordea, ezin izango dute San Pedro etorbidetik (Jose Elosegitik) Donostiarantz sartu.
Uztailaren 3a
Trintxerpe eta Pasai San Pedro: 10:30etatik 17:00etara ezin izango da San Pedro etorbidetik (Jose Elosegitik) Donostiararantz igaro.
Pasai Antxo: Nafarroa etorbiderako irteera guztiak 10:30etik 17:00etara itxita egongo dira. Aurreko egunean bezala, GI-20 errepidera sartzeko Oarso kaleko zubitik igaro beharko dute.
Pasai Donibane: Lasterketa bertatik pasako ez den arren, bizilagunek kontuan izan beharko dute lasterketa Altamirako biribilgunetik igaroko dela Errenteria-Oreretarantz. Hortaz, ezin izango dute bertatik igaro 10:30etatik 17:00era.
