Antxotik Donibanera korrika, "ahalmen, muga, erronka eta zailtasunak ahalduntzeko"
Emakume Korrikalariak egitasmoaren ikasturteari bukaera emateko lasterketa berezia egingo dute bihar Pasaia, Lezo eta Hondarribiko emakumeek. 18:00etan abiatuko dira lasterkariak.
Pasaia, Lezo eta Hondarribiko emakume korrikalariek hitzordu garrantzitsua dute bihar (hilak 14). Izan ere, II. Emakume Korrikalarien Topaketa egingo dute Pasai Antxon. Topaketa baino, lasterketa formatua izango du biharkoak. Emakume Korrikalariak izeneko egitasmoaren ikasturteari bukaera emango diote honekin.
Aurtengo ikasturtean Emakume Korrikalari programan parte hartu duten emakumeek ahalko dute biharkoan parte hartu. Biharkoak zenbait helburu dituela zehaztu dute antolatzaileek, honakoak: “norberaren ahalmenak, mugak, erronkak eta zailtasunak ahalduntzea; jarduera fisikoan eta kirol arloan ahalduntzea; eta emakumeen autonomia eta konfiantza lantzea ziurgabetasun eta lehia apur bat egon daitezkeen eremu batean”.
Antxoko Renfeko geltokitik abiatuko dira lasterkariak, 18:00etan, eta Donibaneko Matxet txiringitoan izango dute helmuga. Bide guztia markatuta izango da, eta bidegurutze zailenetan boluntarioak egongo dira. Lasterketa bukatzean Donibaneko kirolguneko aldagelak erabili ahalko dituzte partaideek. Ondoren, Juanba Berasategi aretoko atarian afari-merienda egingo dute, korrikalari zein laguntzaileek.
Izena emateko 5 euroko bizuma egin beharko dute partaideek, 648 08 63 13 (Sara) telefono zenbakira. Izen-abizenak zehaztu beharko dira.
Korrika egiteko arropa erosoa eramateko deia egin dute antolatzaileek, baita uretara sartzeko eta dutxarako ezinbestekoak direnak.
