Larunbatean izango da kargu-hartze ekitaldia
Maiatzaren 28ko hauteskundeetan aukeratutako ordezkariek bere kargua hartuko dute. EH Bilduk hamahiru zinegotzi izango ditu, eta EAJk, lau.
Joana Mendiburuk hartuko du aginte-makila, larunbatean. Datorren larunbatean, hilak 17, hasiko da 2023-2027 agintaldia. Udalbatza berria osatzeko ezohiko plenoa egingo dute eguerdiko 12:00etan. Maiatzaren 28an egindako hauteskundeetatik ateratako udalbatza osatuko da.
Datorren larunbatetik aurrera, Oiartzunek alkate berria izango du. EH Bilduko Joana Mendiburu izango da hurrengo alkate. Izan ere, hamahiru ordezkari izango ditu koalizioak, zinegotzi bat irabazita. EAJk, berriz, bat galdu eta lau ordezkaritan geratu da.
Jeltzaleen lau ordezkariak aurreko agintaldian zeuden berberak dira. EH Bildun, berriz, bik bakarrik jarraituko dute.
2019-2023 legealdiko udalbatzako kideek pasako diete testigua berriei larunbateko kargu-hartze ekitaldian. Irekia izango da batzarra, baina aretoko edukiera mugatua denez, garaiz joateko eskatu du Oiartzungo Udalak.
