Udaburuko suaren lehen garra piztuko dute bigarrenez
Orereta Ikastolak Sorgingarra jaia antolatu du, udaburuko suaren izaera paganoa nabarmendu eta indartu asmoz.
Iazko ekitaldiaren irudi bat. Argazkia: Orereta Ikastola Sorgingarra jaia antolatu du Orereta Ikastolak larunbaterako. Udaburuko suaren bueltan egin ohi den festaren osagarri da iniziatiba, eta jai horren izaera paganoa nabarmendu eta indartu asmoz antolatu zuten iaz lehenengoz. Honakoa, beraz, bigarren ekitaldia izango du Sorgingarrak, udaburuko suaren lehen garraren jaiak.
Ilunabarrez, 19:00etan hasiko da ekitaldia. Ordu horretan piztuko dute Orereta Ikastolakoek udaburuko suaren lehen garra izango dena Agirre Lehendakariaren plazan. Ez dira bakarrik arituko egiteko horretan, izan ere, Aitzbitarteko Lagunak elkarteko kideak arduratuko dira sua pizteaz. Larruz jantzita, supizteko ardagaia erabiliko dute Aitzbitarte elkartekoek.
Piztutako txinparta buru, Sorgingar kalejira abiatuko da 19:15ean, eta Zumardia, Biteri Txiki, Xabier Olaskoaga plaza, Alfontso XI kalea, , Biteri, Koldo Mitxelena plaza, Maria Lezo eta Madalen kaletik pasako da Herriko plazan amaitzeko. Irurtzungo Orritz Iskidi taldeko izaki mitologikoak, joaldunak eta dantzariak lagun izango dituzte ibilbidean zehar, baita Orereta Ikastolaren Erriola konpartsa ere.
Ibilbidean, Xabier Olaskoaga eta Koldo Mitxelena plazetan emanaldia egingo dute.
Ez dute egiteko makala hartu. Izan ere, larunbatean piztuko duten lehen gar hori San Joan bezperara arte piztuta mantentzea dute asmo: “Zergatik ez izan hilaren 23an Herriko plazan Ereintza dantza taldeak aurreskuaren ostean pizten duen belar metaren txinparta?”.
Jaiaren ardatz, “herria, komunitatea, euskara eta euskal kultura” direla nabarmendu du Orereta Ikastolak, “ikastolaren baloreekin bat egiten duela sinetsita antolatu dugu Sorgingarra jaia”.
Esker ona azaldu die halaber, festa hori antolatzeko “ilusio eta gogoz” arituko diren eragile laguntzaileei, eta herritar guztiak animatu ditu parte hartzera, “Sorgingarrak ere herritik sortu eta herriarentzako eta herritarrentzako festa izan nahi baitu”.
Ondokoa, Orereta Ikastolak lehenengo Sorgingarra festaren ekitaldiaren bideoa da.
