Xenpelar Tailerren ikasturte berrirako eskaintza aurkeztu dute
Izena emateko epea irailean zabalduko dute. Gaur arratsaldean tailerren bilera-aurkezpena egingo dute. 18:30ean izango da, Merkatuzarreko Jose Luis Caso aretoan.
Xenpelar tailerren eskaintza aurkeztu dute gaur. Mende erdia bete dute ateak zabaldu zituztenetik Xenpelar Tailerrek. Bide luze horretan, ehunka herritar pasa dira bertatik euren abileziak findu eta sendotzeko. Ikasturtea amaituta eta bertan antolatutako diziplina ezberdinetako tailerretan jasotako uzta erakusgai dutela aurkeztu du Maite Gartziak datorren ikasturterako eskaintza. Patchwok tailerrean, josteko makinak, eta hainbat lanen artean eman du aurtengoan ere oparo datorren eskaintzaren berri jarduneko Kultura zinegotziak.
Bete dituen urteak bezain biribil, 50 dira eskainiko dituzten ikastaroak datorren ikasturtean; guztiak ere, helduei zuzendutakoak, urtekoak edota lauhilekoak, hainbat diziplinetan banatuta: pintura, zeramika, argazkigintza, egur taila, altzarien zaharberritzea eta patchworka. Tailerrek astean bi eta sei orduko iraupena izango dute.
Esan bezala, tailer horietan izena emateko epea irailean izango da. Online egiten dutenek, irailaren 4tik 15era egin beharko dute webgunearen bidez. Modu presentziala nahiago duten herritarrek, berriz, Zu! Zure Udala herritarren arreta zerbitzuan egin beharko dute irailaren 11tik 15era bitartean, eta horretarako, aurretik hitzordua eskatu beharko dute 943 44 96 00 edo 010 telefono zenbakira deituta—irailaren 7a eta 15aren artean—.
Izena ematen duten herritar guztiek plaza lortzeko aukera bera izan dezaten, plazen esleipena zozketa bidez egingo da eskaera kopurua plaza kopurua baino handiagoa den kasuetan. Izena emateak, ez du beraz, plaza bermatuko.
Tasei dagokienean, berriz, norberaren gaitasun ekonomikoaren araberakoak izango direla gogorarazi du Gartziak: “Horretarako, matrikularekin batera, eskaera eredu normalizatuan egin beharko da, bai online eta bai presentzialki”. Ebazpena ondoren egingo da.
Tailerren gaineko informazio guztia, hemen klik eginda kontsulta daiteke. 943 44 96 35 telefono zenbakira ere deitu daiteke.
Gaur arratsaldean tailerren bilera-aurkezpena egingo dute. 18:30ean izango da, Merkatuzarreko Jose Luis Caso aretoan.
Zeramikak arrakasta iaz
Eskaera ugari jasotzen dituzte Xenpelar Tailerrek eskaintzen dituzten 300dik gorako plazak osatzeko. Diziplina guztiek dute harrera ona, baina urtetik urtera aldatzen doazela azaldu dute arduradunek. Iaz, bereziki, zeramika izan zela arrakasta handiena lortu zuena aitortu dute: “Jende asko gelditu zen itxaron zerrendan”.
Zaharberritze tailerrak ere harrera ona du, itxaron zerrenda izaten du, eta egur tailak ere erantzun bikaina jasotzen duela baietsi dute. Pachwork tailerreko ikasleen leialtasuna nabarmen jarri dute, “urtero-urtero etortzen dira”.
