Ekainaren 22an irekiko dute Listorreta-Barrengoloiako informazio gunea
Mendi eta orientazio ibilbideen eta fauna eta floraren inguruko informazioa jarriko dute bisitarien eskura, aurrerantzean.
Listorreta-Barrengoloiako informazio bulegoa datorren asteko ostegunean irekiko dute berriro, ekainaren 22an. Aurrerantzean, beraz, bulegoko lankideek mendi ibilbide homologatuei eta inguruko ondare megalitiko aberatsa ikusteko ibilbideei buruzko informazioa eskainiko dute. Hortaz gain, familiei bideratuta, orientazioko ibilbideen mapak egongo dira bertan, baita inguruko flora eta faunari buruzko informazioa ere. Informazio bulegoa irekita egongo da, ostegunetan, 08:30etik 14:00etara; eta ostiral, asteburu eta jaiegunetan, 08:30etik 14:00etara eta 15:00etatik 18:30era.
Udan zehar hainbat jarduera berri proposatuko dituzte, eta zerbitzuz hornituko dute ere eremua: komunak, mahaiak, bankuak, iturriak, jolas guneak, barbakoa erretegiak edota autokarabanentzako atsedenlekuak instalatuko dituzte.
Aiako Harriko Parke Naturalerako eta Kontserbazio Bereziko Eremuko sarbide nagusian, informazio gunea urriaren 15era arte egongo da zabalik.
