'Broadway' Lekuonara ekarriko du Zariak
New Yorkeko kultur eremu ospetsuan sortutako musikalen kantuen aukeraketa batekin ikuskizuna egingo du bihar Zaria Koru Eskolak.
Handira bukatuko du Zaria Koru Eskolak ikasturtea. New Yorkeko Broadwayko doinuak Errenteria-Oreretara ekarriko ditu. Broadway musikala eskainiko du Lekuona Fabrikako areto nagusian, bitan gainera.
Lehenengo emanaldia 17:00etan izango da, bi ordu geroago (19:00etan) bigarrena. Broadwayn eskaini diren hainbat musikalen kantuekin osatu dute ikuskizuna Zariakoek, baina dantza eta antzerkia ere ez dira faltako. Ikuskizun bete-betea prestatu dute. “Ikusleak gozatuko du”, ziurtatu dute Zariakoek.
Bertan izateko sei euroko sarrera ordaindu behar dute arte-eszenikoen maitaleek. Horiek Errenteriako Udalaren sarrera salmenta zerbitzuaren bitartez eros daitezke.
