Urteko uzta oholtzara
Emanaldiak gaur hasi eta hilaren 22ra arte egingo dituzte Herri Arte Eskolako diziplina ezberdinetako ikasleek.
Herri arte eskolako ikasleak. Argazkia: Herri Arte Eskola Herri Arte Eskolako ikasleek ikasturte amaierako ekitaldiak eskainiko dituzte gaurtik hasi eta hilaren 22ra arte, Niessen Kulturgunean, Lekuona Fabrikan eta Herri Arte Eskolan. Horietara joateko gonbidapenak, eskolako arreta bulegoan eskuratu beharko dira. Dantza, musika, antzerkia, arte plastiko-ikusizkoak eta hitzako ikasleen lana ikusi ahalko da emanaldietan.
Ikasturte bukaerako emanaldiak egiten dituzten bitartean, erakusketa bisitatzeko aukera ere izango da eskolan bertan; arte plastiko-ikusizkoen ikasleek egina da erakusketa hori.
Kamara taldeek, perkusio taldeak, eta jazz eta konboak zabalduko dute egitaraua gaur, eta ipuin musikatuekin bukatuko dira emanaldiak hilaren 22an. Berezia izango dela azken emanaldi hori nabarmen jarri dute Herri Arte Eskolako arduradunek: “Emanaldi berean arituko dira narratzaileak, antzezleak, musikariak eta abeslariak”.
Matrikula zabalik eta berrikuntza ugari
Herri Arte Eskolan izena eman nahi dutenek zabalik dute datorren ikasturterako matrikula epea. Informazio guztia, hemen klik eginda kontsulta daiteke.
Irailetik aurrera, gainera, hainbat berrikuntza “interesgarri” txertatuko dituztela eskolako plangintzan iragarri dute. Batetik, Arte plastiko-ikusizkoetan Sormen proiektuak I eta II —8-12 urte artekoentzat—, Marrazketa-komikia-animazioa eta Argazki eta soinu laborategia —12-14 urte artekoentzat—, eta Ilustrazio esperimentala-autoedizioa-fanzinea, eta Bideoartea eta soinu instalazioak —15-17 urte artekoentzat— ikasgaiak gehituko dituzte; 12-17 urte arteko ikasleei begira ere Pintura-teknika mistoak-muralgintza ikasgaia jarriko dute martxan.
Musikari dagokionean, Euskal aerofonoak (alboka-txistu-dultzaina) ikasgaian, saio berean eta talde txikietan instrumentu horiek ikasten hasteko aukera egongo da 8 urtetik aurrera (helduak barne). Gainera, 12-18 urte bitartekoek Musikal batean parte hartzeko aukera izango dute ahotsa, gorputz adierazpena, irudimena eta eszenaratzea landuz, eta, lehen aldiz, jazzak eta inprobisazioak ere hezkuntza proiektuan lekua izan dezaten, Big-band bat osatu nahi dute.
Antzerkian, Hastapen eta Laborategia taldeak sortuko dira helduentzat, sormenean, talde elkarrekintzan, ahots zein gorputzarekin ahaldundu daitezen.
Halaber, Hitzaren arloan, hitzarekin irudimenez jolasten hasteko, 8-12 urte bitartekoentzat, Liburuen mundua I eta II, 12 eta 17 bitartekoentzat, Idazketa sortzailea I eta II, eta 18 urtetik gorakoentzat, Sormena eta Hitza esakiniko ditu Herri Arte Eskolak.
Eta hori gutxi balitz, 18 urtetik gorako herritar ororentzat arte diziplinetako bakoitzean Ikusle Eskolaren aldeko apustu estrategikoa egin dute. Ikasgai horren bidez, arteaz “hobe eta gehiago gozatzeko gakoak erakustea”.
Emanaldien hitzorduak
Gaur, ostirala
- Kamara taldeak eta perkusio taldea: 18:00etan, Herri Arte Eskolako 111 entsegu-gelan
- Jazz konboa: 19:00etan, Herri Arte Eskolako 111 entsegu-gelan
Bihar, larunbata
- Antzerkia (haurrak eta gazteak): 9:45ean, Niessen kulturguneko auditorioan
- Dantza urbanoak eta garaikidea: 12:30ean, Niessen kulturguneko auditorioan
- ‘Singin´ in the rain’ musikala: 16:30ean, Niessen kulturguneko auditorioan
- Euskal dantza: 19:00etan, Niessen kulturguneko auditorioan
Etzi, igandea
- Balleta: 12:00etan, Niessen kulturguneko auditorioan
Hilak 19, astelehena
- Sokak: 18:00etan eta 19:00etan, Niessen kulturguneko entsegu gelan
- Harmonia + konposizio ikasleak: 18:00etan, Herri Arte Eskolako 111 entsegu-gelan
Hilak 20, asteartea
- Haizeak + perkusioa: 18:00etan, Herri Arte Eskolako 111 entsegu-gelan
- Trikitilariak: 19:30ean, Herri Arte Eskolako 111 entsegu-gelan
Hilak 21, asteazkena
- Pianoak: 18:00etan eta 19:00etan, Herri Arte Eskolako 111 entsegu-gelan
- Ikasleen banda, orkestra + abesbatza, Herri Musika Taldea (euskal instrumentu tradizionalak) + dantza: 19:00etan, Lekuona Fabrikan
Hilak 22, osteguna
- Ipuin musikatuak: 18:30ean, Lekuona Fabrikan
