"Indarkeria matxista guztion ardura da eta guztion jarrera aktiboa ezinbestekoa izango da"
Mugimendu feministak deituta, elkarretaratzea egin dute, Bilboko hilketa matxista gaitzesteko. Samina eta elkartasuna adierazi diete biktimaren gertukoei.
11:30ean elkartu dira plazan, hilketa matxista salatzeko. Gizon batek emakume bat hil zuen atzo Bilboko Santutxu auzoan. 89 urte zituen andreak. Eusko Jaurlaritzako Segurtasun Sailak baieztatu duenez, hilketa matxista bat izan da.
Hilketa hori salatzeko, elkarretaratzea egin dute, Oiartzungo Feministen Asanbladak deituta. Gogorarazi dutenez, hilabete eskasean hirugarren aldiz kalera ateratzera behartu ditu indarkeria matxistak, Orio eta Gasteizeko hilketen ondoren. “Elkartasuna eta samina” adierazi diete emakumearen gertukoei.
Bilboko hilketa “emakumeok kolpatzen” dituen ondoriorik “krudelena” dela berretsi dute. Hilketa aurpegirik “gordinena” dela esan dute, baina egunerokoan “beste hamaika” aurpegi hartzen dituela indarkeria matxistak.
“Beste behin ere nazkatuak gaudela ozen aldarrikatu nahi dugu. Indarkeria matxistak ahalbideratzen dituen jarrera konplize guztiekin amaitzea eta erasotzaileei aurre egitea jendarte osoaren ardura izan behar du”, esan dute.
Urrats “handiagoak” eskatu dituzte, eta norberak, “bere esparruan”, ardurak hartzekoarena ere. “Indarkeria matxistak ez du etenik izango gizartea egituratzen duen matxismoarekin amaitu arte. Indarkeria hau sistema heteropatriarkalaren ondorioa baita”, salatu dute.
Indarkeria mota hori salatzeko “behar bezain beste aldiz” aterako dira kalera. “Gai hau guztion ardura da eta guztion jarrera aktiboa ezinbestekoa izango da indarkeria matxistarik gabeko gizarte bat eraiki artean“, aldarrikatu dute.
Feminismoa gizartea “errotik” aldatzeko bidea dela esan dute, eta autodefentsarako deia egin dute. “Indarkeriarik gabeko bizitza bizigarrien aldeko apustu erradikal bat egiten dugu. Aski da! Emakumeok aske eta bizirik!”, bukatu dute elkarretaratzea.
