Oiartzun, hirugarrenez jarraian, Herriarteko finalera
Madalensoroko zaleen laguntzarekin, oiartzuarrek kanporaketa berdindu dute hiruna garaipenera, eta tantoen aldeagatik pasatu dira.
Madalensoron eman behar zioten buelta kanporaketari, eta buelta eman diote. Oiartzun eta Ataunek esku huskako Gipuzkoako Herriarteko Txapelketaren finalerdietako itzuliko hiru partidak jokatu zituzten atzo arratsean.
Goierritarrak 2-1eko abantailarekin iritsi ziren Beheko Plazako kantxara, baina oiartzuarrek bere publikoaren babesa zuten atzokoan. Lehenengo partida 22-2 irabazi zuten etxekoek, Galardi eta Olaiz kadeteen eskutik.
Beste bi partidetako bat irabazi beharra zuten, Ataundik hamalau tantoko abantailarekin bueltatu baitziren oiartzuarrak, bi partida galdu arren.
Gazte Mailako partida irabazi eta ataundarrak hamabi tanto baino gutxiagotan uzten bazuten, oiartzuarrak finalean izango ziren. Pentsatu eta egin: Landa eta Zabaletak osatutako bikoteak joaneko partidaren arantza kendu, eta ataundarrak bost tantotan utzi zituzten.
Oiartzuarrek presiorik gabe jokatu zuten Senior Mailako partida, festa giroan. Etxeberria eta Olaizek 14-22 galdu zuten ataundarren kontra, baina berdin du horrek: oiartzuarrak finalean dira, hirugarren urtez jarraian.
Finala, datorren asteburuan
Finalerako txartela lortuta, pilotari oiartzuarrek bihar Azpeitian gertatzen denari jarri beharko diote arreta. Azpeitiak eta Andoainek jokatuko dute finalista izateko ohorea.
Azpeitiarrak faborito dira, Andoaingo hiru partidak poltsikoratu baitzituzten, eta tanto diferentzia +46koa dute. Urolatarrek irabaziz gero, 2017, 2021 eta 2022ko finala errepikatuko litzateke.
Final hori datorren asteburuan jokatuko dute, Donostiako Atano III.a pilotalekuan. Eguna eta ordua zehazteke daude oraindik.
