Gorenean hasi dute Pasaiako traineruek arraun denboraldia
KAE1 Ligako lehen estropada San Juanek irabazi du, eta bigarrena San Pedrok. Moreak dira buru sailkapen orokorrean, eta arrosak bigarren.
Asteburu borobila izan dute sanpedrotarrek. Etxeko estropada irabazi eta Tirri Tarraren jaialdiarekin ospatu dute. 
Joan den larunbatean hasi ziren KAE1 eta ETE arraun ligak. Emakumeen mailan ez dago Oarso-Bidasoko ordezkaririk, Hibaika eta Hondarribia EuskoTren Ligan arituko baitira aurten, uztailaren 1ean hasita. Bertako gizonen traineruek goren-gorenean abiatu dute sasoia, sailkapenean lehen eta bigarren direlarik, hurrenez hurren, San Pedro eta San Juan. Hondarribia B bederatzigarren da.
Donibane-Ziburuko Bandera izan zuten jokoan herenegun KAE1-eko arraunlariek, eta San Juan erraz nagusitu zen, Donibane Lohizune Ziburuko gizonen XXXI. Ikurrina poltsikoratuz. Bigarren Lapurdi izan zen, eta hirugarren San Pedro. Hondarribiak hamabi ontziren artean hamargarren egin zuen sasoiko lehen estropada.
Atzo, igandea, XIII. Kepa Deun Arrantzaleen Kofradia Ikurrina etxean gelditu zen. Sanpedrotarrak irteeratik izan ziren lehiaren buru, eta hasi bezala bukatu zuen Libiak, lehenengo. Arrosek ezin izan zioten eutsi aurreko jardunaldiko mailari, eta bosgarren egin zuten atzo badiako uretan. Hondarribiak, aldiz, larunbatean baino emaitza hobeak lortu zituen, hamargarren postutik zazpigarrenera igaroaz.
Gauzak horrela, eta ligako lehen bi norgehiagoketako puntuak batuta, pasaitarrak dira buru KAE1en. San Pedrok 22 punturekin du buruzagitza, eta bi puntu gutxiagorekin atzetik du San Juan. Bidasoko ordezkari Hondarribia B bederatzigarren da, bederatzi punturekin. Horra hor sailkapen orokorra:
KAE1, sailkapena
| Elkartea | Puntuak | |
|---|---|---|
| 1º | Sanpedrotarra A.E. | 22 |
| 2º | San Juan CMO Valves | 20 |
| 3º | Lapurdi Antton Bilbao | 20 |
| 4º | Zumaiako Telmo Deun A.k.e. | 18 |
| 5º | Arkote A. T. | 16 |
| 6º | Zarautz Gesalaga Okelan | 13 |
| 7º | Camargo | 13 |
| 8º | Pedreña | 12 |
| 9º | Hondarribia | 9 |
| 10º | Deusto-bilbao | 7 |
| 11º | Busturialdea | 3 |
| 12º | Castro Canteras de Santullan | 3 |
