Matxismoaren bortizkeriak behartuta, elkarretaratzea gaur Antxon
Hilabete eskasean hiru bider hartu behar izan ditu kaleak Pasaiako mugimendu feministak, hilketa matxistengatik. Azkena, 89 urteko andrazkoa, Bilbon.
Antxon, maiatzaren 28ko hilketa matxista salatzeko elkarretaratzeko argazkia. 
Joan den ostegunean 28 urteko gizonezko batek 89 urteko izeba labankadaz erail zuen Bilboko Santutxu auzoan. Hilabete eskasean, indarkeria matxistak Euskal Herrian hildako hirugarren emakumea izan da.
Bizilagunek kontaturikoaren arabera, gizona andrazkoarekin bizi zen noizean behin, hura zaintzen omen zuelakoan, mugikortasun arazoak baitzituen andreak. Iragan ostegun eguerdian Ertzaintzaren patruila bat kalean geldiarazi zuen hiltzaileak, senideari bizia kendu ziola aitortzeko.
Hilabete bakarrean hiru hilketa matxista izan dira Euskal Herrian. Maiatzaren 16an, gizon batek Lourdes del Hoyo bikotekide ohia tiroz hil zuen Orion (Gipuzkoa); hil horretako 28. egunean, bestalde, Maialen Mazon hil zuen Jaime Roca bikotekide ohiak Gasteizen, hiru urteko alaba alboan zuela. 2003tik 120 emakume eta 11 haur erail ditu bortizkeria matxistak Euskal Herrian.
Amorrazioa eta autodefentsa feministaren aldeko deia kalean aldarrikatuko ditu beste behin Pasaiako mugimendu feministak. Horretarako elkarretaratzea deitu dute gaurko, astelehena. 19:00etan Pasai Antxoko Biteri plazara deitu dituzte bizilagunak.
