Ikasturte amaierako topaketa egingo dute Oarsoaldeko Rugbyzaleek
Asteazkenean 19:00etan saio berezia egingo dute Fanderiako futbol zelaian. Hirugarren denboran gerturatutako guztiekin ariko dira.
Ikastaro baten argazki bat. Argazkia: Oarsoaldeko Rugbyzaleak. Oarsoaldeko Rugbyzaleak elkarteak asteazken arratsaldean bukatuko du bere lehenengo denboraldia, eta horri begira topaketa prestatu dute. 19:00etan hasiko da Fanderiako futbol zelaian. Azken saio horretarako gonbidapen irekia zabaldu dute, “jokalari, zale, zein kirol honetan ezer ez dakien edonori begirakoa”.
Gerturatzen direnek, beraz, meleak eta touchak nola egiten diren ikasi eta plakajerik gabeko partida, tokata bat alegia, jokatuko dute, eta amaitzeko, kirol obalaren tradizioa den hirugarren denbora partekatuko dute.
Aurtengoa lehen ikasturtea izan dute eta iazko azarotik aurrera, asteazken eta igandetan ikastaroa egin dute Fanderiako zazpiko futboleko zelaian. Elkarteak oso positibotzat jo du ikastaroekin hasi izana. Xabi Sanchez koordinatzailearen hitzetan errugbia Oarsoaldera hurbiltzeko saiakera izan da, “bi helburu argi genituen hasieran: jokalari eta zale berriak lortzea, eta dagoeneko zirenek erreferentzia bat izan zezatela Oarsoaldean. Biak bete ditugula esan dezakegu eta, datozen urteetan erronka gehiago lortzeko bidea jarraituko dugu”.
