Baratzeetako gaixotasun eta izurriteak ekiditeko informazioa, Lezon
Ostegunean izango da Furgobaratza Lezoko Baratze Parkean, 18:00etatik 19:30era. Baratzea dutenei eta ez dutenei emango diete informazioa.
Furgobaratza Lezoko Baratze Parkean izango da hilaren 22an (ostegunean) 18:00etatik 19:30era. Gai zehatz baten gaineko argibideak emango dizkiete han direnei (baratzea izan edo ez): baratzeetako gaixotasun eta izurriei aurre egiteko aholkuak emango dituzte Kutxa Fundazioari esker abian den Furgobaratza egitasmoko kideek.
Lezoko Baratze Parkean 59 partzela daude osotara. Lezoko Udalak jakinarazi du horietako bat eskuratzeko aukera zabalik dela, eta eskaera egiteko udalaren informazio bulegora joan behar dutela interesdunek. Alta, baldintza batzuk bete behar dituzte eskatzaileek, hala nola, Lezon erroldatuta egotea edo udalarekin zorrik ez izatea.
Oroitarazi dute baratzeetan sortutakoak autokontsumorako direla, eta ekologikoan landu behar direla.
