[Bideoa eta galeria] Xoxolur Eguna, bikaina
Igandean eman zuen bukatutzat Xoxolurrek ikasturtea, herrian. Datorren sasoiari begira jarri dira jada Lezoko mendizaleak.
Xoxolurrekoak, igandean, Mitxintxola gainean. Urteko bederatzigarren eta azken irteera egin zuen igandean Xoxolur Mendi Klubak. Irteera bakarrik ez, Xoxolur Eguna izan zen hilaren 18koa. Izan ere, azken txangoarekin bat, Lezoko mendizaleek ohitura izaten dute sasoia behar bezala bukatzeko: bazkaria eta jolasak egin zituzten herrian ibilaldiaren ondoren. 60 bat lezoar izan ziren egunarekin bat egin zutenak. 60, eta Xalto pailazoa.
Goizean, 3-4 orduko mendibuelta egin zuten Jaizkibeldik, Xaltoren konpainia ezinbestekoarekin. Energia hustuketa egin ondoren (besteak beste Mitxintxola gaina eta Xoxolur bisitatu zituzten), hori berreskuratzera bildu ziren jada herrian, Tiñelun bazkaria egin baitzuten. Horren ondoren, klasikoa: jolasean, euskaraz eta familia giroan, izan ziren.
Jada hurrengo ikasturteari begira jarri da Xoxolur. Indartsu hastea da euren xedea: santakrutzen ondoren, irailaren 23 eta 24an, bi eguneko irteera egiteko asmoa dute, Nafarroa aldera. Aurrerago emango dute informazio zehatza.
Bien bitartean, jarraian, Xoxolurrekoek HITZAri emandako bideoa (bazkalondoko jolasena) eta argazki sorta ikus daitezke:
