Xabier Leteren omenezko eskultura jarri dute Landetxen
Leteren jaiotetxetik gertu jarri dute eskultura, Landetxeren sarrera nagusiaren kanpoaldean. Eneko Salaberriak egin du eskultura.
Xabier Lete idazle, poeta eta kantariaren omenezko eskultura bat jarri dute Landetxe kultur aretoaren atarian. Inguru horretako etxe batean jaio zen Lete 1944an, eta honekin sortzailea “omendu” nahi izan du udalak, “Oiartzungo historian izan duen garrantzia aitortu eta euskal kulturari egindako ekarpena eskertzeko”.
Leteren silueta bat ikus daiteke eskulturan. Lau xaflaz osatutakoa da, eta “perspektiba jolaserako bide ematen” duela diote udaleko iturriek.
Eneko Salaberria oiartzuarrak egin du eskultura, eta honetan artistaren geruzak nabarmendu nahi izan ditu. Siluetaz gain, poetaren hitzek zeharkatzen dute eskultura.
Atzo inauguratu zuten eskultura, Joana Mendiburu alkateak, Iosune Cousillas kultura zinegotzi ohiak, Eneko Salaberria egileak eta Arantxa Letek, Xabier Leteren arrebak.
“Izan dadila Leteren obra Landetxen sortuko diren proiektu berrien inspirazio iturri!”, erantsi dute udaleko iturriek.
Atzo inauguratu zuten Leteren omenezko eskultura.
