[Bideoa eta irudiak] Herriarena izan da Touringen mendeurren festa
Ostegunean bete zituen 100 urte Touring futbol taldeak, baina ospakizun egun handia gaurkoa da. Festa giroan, Herriko Plazatik Fanderiara joan dira herritarrak.
Sasoia hasi berri duenaren indarrarekin atera da gaur eguzkia, eta gogoz atera dira kalera ere herritarrak Touringen mendeurrena ospatzera. 100 urte bete ditu taldeak eta nabaritu da gaur herrian zehar.
Egun osoko egitaraua da proposatu dutena. Goizetik haurrentzako puzgarriak daude Fanderiako kautxozko futbol zelaian, eta segidan, Ereintzako txistulariak kaleko giroan eragitera irten dira.
Eguerdi aldera, denak itzal bila zebiltzala, Xanti eta Maialen batu dira festara. Herriko Plazatik, Deiadar txarangarekin batera, Fanderiako futbol zelaira joan dira. Erraldoi eta buruhandien fantasiazko mundu honetan, haurrak izan dira protagonista handiak.
Futbol partidak jokatzen ari dira, oraintxe, eta horiekin bukatzerakoan Koldo Mitxelenako jolastokira joango dira bazkaltzera. Gero, 18:30ean, indarrak hartuta, Pirata agertuko da Rockaleaneko kideekin eta erdialdeko kaleen melodiaz arduratuko dira.
Eguna borobiltzea EMKEren esku utzi dute; Andra Mari, Landarbaso, Garrintzi eta Telleri abesbatzek; Ereintza Dantza Taldeak eta Xanti eta Maialenek herri kontzertua eskainiko baitute. 22:00etan izango da, Herriko Plazan.
