Laugarren luze izugarria, eta bigarren bandera 'Libia'-rentzat
KAE1eko laugarren estropada bere egin zuten atzo moreek, batez ere laugarren luzean egindako lan ikusgarriagatik. San Juan, hirugarren atzokoan.
San Pedroko arraunlariak, atzo, ospakizun betean. Argazkia: Sanpedrotarra Arraun Elkartea. KAE1 Ligako laugarren estropada egin zuten atzo Mundakan. San Pedrok sasoiko bigarren bandera bere egin zuen, batez ere azken luzean egindako lan izugarriagatik: olatuak bata bestearen atzetik hartu, eta azken ziabogara arte berdintasunean garatzen ari zen estropada hautsi egin zuten Libia-koek. Gogoratzeko azken luzea izan zen moreena. Hala, bigarren txandako Arkote bigarrena izan zen sailkapen nagusian, San Pedrotik zazpi segundora (21.47), eta hirugarren sailkatu zen San Juan, 21.51 denborarekin. Atzokoan, Lapurdi laugarren.
Izan ere, aurtengo KAE1 emozioz beterikoa izango dela ikusi da lehen lau estropadetan. Atzokoa horren seinale izan zen. Lau traineruren artekoa izango da Eusko Labelera igotzea ahalbidetuko duten play-offetarako bi postuen lehia, eta tartean San Pedro eta San Juan dira. Arrosek atzo estropada oso ona egin zuten, baina hirugarren luzean amore ematen hasi, eta laugarrenean ezin izan zioten eutsi San Pedroren garaipen goseari. Lapurdi atzean utzi zuten, hori bai, baina Erreka-ren aurretik izan zen sailkapenean bigarren txandako Arkote.
KAE1en sailkapena eta emaitzak ikusteko klik egin hemen.
Larunbatean, Elantxoben izan zuten jokoan KAE1ekoek sasoiko hirugarrena. Lapurdi izan zen garaile (20.43), gutxira iritsi zen San Pedro (20.47) eta laugarren izan zen San Juan (20.54) Arkoteren ondoren (20.51). Laukote horretatik aterako dira play-offerako bi plazak, eta erregularrena denak izango du saria.
Gauzak horrela, KAE1en sailkapen nagusian lehena da egun San Pedro, bigarren postuan da Joseba Fernandezen Lapurdi, eta hirugarren dira sanjuandarrak. Hamabost estropadako liga da KAE1, beraz, emozioek luzerako bidea izango dute.
