35 urteko errekorra hautsi du Asier Fernandez lezoarrak
Atletismoko 100 metroko Gipuzkoako markarik onena bitan jaitsi zuen lezoarrak larunbatean, Ordiziako meeting-ean.
Asier Ferandez, larunbatean Ordizian, egin zuena sinetsi ezinda. Argazkia: Instagram / @asier.ferni Handia egin zuen Asier Fernandez Mindegia atleta lezoarrak joan den larunbatean. Ordiziako atletismo meeting edo topaketan 100 metrotako Gipuzkoako errekorra hautsi zuen, bitan gainera: 1988tik zuen errekor hori Valentin Rokandio donostiarrak, hain justu, lezoarraren egungo entrenatzaile denak. 35 urteko iraupena izan du Rokandioren markak, Fernandez iritsi arte.
Maila handiko topaketa izan zen Ordiziakoa, nazioartekoa. Hala, 100 metroko proban lehenik finalerdiak egin zituzten, eta onenek finalerako sailkapena lortu zuten. Lezoarrak 10 segundo eta 44 ehuneneko denbora egin zuen finalaurrekoan: bertan, jada, Rokandioren marka txikitu zuen, 10 segundo eta 45 ehunenekoa baitzen. Finalean, berriz, hori hobetzea lortu zuen: 10 segundo eta 38 ehunenekora jaitsi zuen marka. Beraz, denbora tarte eskasean, bitan hautsi zuen Gipuzkoako markarik onena Fernandezek.
Ordiziako finalean hirugarren izan zen atleta lezoarra, Harlyn Angel Perezen (10.19) eta Benjamin Richardsonen (10.20) atzetik. Bero egin zuen larunbatean Ordizian. Beroago eta pozarren itzuli zen Fernandez handik Lezoko etxera.
