Lezo: erne Tourragatik izango diren trafiko aldaketekin
Uztailaren 2an eta 3an batik bat trafikoan aldaketa asko izanen dira Tourragatik. Jaizkibel, ostiraletik igandera autoentzat itxita.
Uztailaren 2an Tourrak Lezotik izango duen ibilbidea. Uztailaren 2 eta 3an pasako da Frantziako Tourra Lezotik. Horrek aldaketa nabarmenak eragingo ditu herrian, batez ere trafikoari dagokionez. Lezoarren informaziorako hainbat euskarri prestatu ditu Lezoko Udalak. Horien artean, udalaren webgunean informazio osoa ezarri du, sare sozialetatik ere zabalduko duena; gainera, herriko soto guztietan eta industrialdeetan informazio orriak jarri ditu, ibilbideak irudikatzeko mapa eta guzti. “Lehenik eta behin, barkamena eskatu nahi diegu lezoarrei lasterketa honek eragingo dituen kalteengatik. Mundu mailako lasterketarik ezagunena da, eta giro bikaina sortuko da. Baina trafikoan batik bat hainbat kalte sortuko dituela argi dago”, esan du Mikel Arruti alkateak.
Honakoak dira txirrindularitza lasterketak izango dituen eragin nabarmenenak:
- Jaizkibel ibilgailuentzat itxita egongo da hilaren 30etik (ostiraletik) uztailaren 2ra (igandea) arte.
- Uztailak 2, igandea (Gasteiz-Donostia etapa). Lasterketa 16:53 aldera pasako da herritik.
- Hondarribitik Jaizkibelgo errepidetik (GI-3440) iritsiko da lasterketa Lezora. Herria Jaizkibel hiribidetik zeharkatu ondoren, Altamirako biribilgunetik igaroko da lasterketa eta Donostiako erdigunean amaituko da: Jaizkibel hiribidea erabat moztuta izango da 14:00etatik 18:00etara, ibilgailuentzat eta oinezkoentzat.
- Oinezkoak: Jaizkibel hiribidearen alde batetik bestera joateko bide bakarrak Bekoerrota kiroldegiko pasabidea eta Altamirako lur azpiko pasabideak izango dira.
- Uztailak 3, astelehena (Amorebieta-Baiona etapa). Lasterketa 15:45 aldera pasako da herritik.
- Donostiatik Altamirako biribilgunera iritsiko da lasterketa, handik Renfe geltokirako bidea hartzeko, Errenteria-Oreretarantz. Altamirako eta Gaintxurizketako biribilguneak itxiko dituztenez, Lezo ibilgailuei dagokienez inkomunikatuta egongo da 12:50etik 16:45era.
- Herritik oinez atera edo sartzeko, Bekoerrota kiroldegiaren parean, Jaizkibel hiribidearen gaineko oinezkoentzako pasabidea erabili beharko dute herritarrek. Puntu horretatik Renferen geltokira joan ahal izango da. Trena da gomendatzen den garraiobidea, autobus zerbitzuetan ere bide mozketek eragina izango baitute.
- Bi egunetan: Lezon izango diren larrialdi zerbitzuentzako sarbide bat prestatuko dute portu eremutik. Larrialdiren bat izanez gero, 943 52 40 03 telefono zenbakira deitu behar da, Lezoko Udaltzaingora alegia
Arrutik gogorarazi du Eusko Jaurlaritzak baimendu duen kirol-ekitaldi bat dela Tourraren pasaera. “Lezoko Udalak herritarren ongizatea sustatzeko lan handia egingo du, eta laguntza emateko prest gaude. Hala ere, udaletik kudeatu ezin diren gaiak, lasterketaren webgune ofizialean kontsultatu beharko dira, Eragozpenak atalean.
