Beloaga gazteluko irisgarritasuna hobetu dute
Beloaga gaztelua berreskuratzeko gauzatu dute udalak, Beloaga Bizirik-ek eta Aranzadik. Irisgarritasuna eta segurtasuna hobetu dituzte.
Irisgarritasuna eta segurtasuna hobetu dituzte. Beloaga gaztelua berreskuratzeko proiektua burutu dute Oiartzungo Udalak eta Beloaga Bizirik elkartak, Aranzadi Zientzia Elkartearekin elkarlanean.
Arkaleko harkaitzetan eraiki zuten Erdi Aroko gaztelu hori, eta Gipuzkoako mantentzen den garrantzitsuenetakoa da.
Oiartzungo ondarearen parte hori berreskuratzeko lanean aritu dira elkarteak, 2010etik. Garai hartan sasi eta ote artean ezkutatuak zeuden gaztelu izandakoaren arrastoak. Auzolanean hasi ziren pixkanaka ingurua txukuntzen.
2015ean hitzarmena sinatu zuten hiru aldeek, berreraikitzeko proiektua martxan jartzeko. Hiru fasetan egin dute. Lehenengoan dorre nagusiaren hormak konpondu zituzten. Bigarrenean arma plazako paretak. Bukatu berri duten azken fasean gaztelura joateko irisgarritasuna hobetu dute.
Hobekuntzak
Egitura nagusia berreraiki dute, bisitariak bertara joan daitezen, gazteluaren historia ezagutzeko. “Nor garen ulertzeko ezinbestekoa baita nor izan ginen, nondik gatozen eta zer gertatu zen ezagutzea”, esan du Oiartzungo Udalak.
Gaztelura iristeko bidearen irisgarritasuna hobetu eta segurtasun neurriak jarri dituzte. Dorre nagusira igotzeko eskailerak egin dituzte eta plataforma bat ezarri dute bertan. “Hobekuntza hauek ez dute inpakturik izan hormetan”, berretsi du udalak.
“Bereziki zaindu dituzte erabilitako materialak, ahalik eta eragin txikiena izateko”, gaineratu du udalak. 132.500 euroko aurrekontua izan du hirugarren fase horrek.
Panel informatiboak jarri dituzte inguruan pasatakoa kontatzeko. Inguruko txoko garrantzitsuak ere markatuta daude karteletan: mairu-baratzak, Andrearriagako hilarria, Arkaleko Behatokia, Langile Batailoien barrakoiak…
