Menpekotasuna duten Mugi txartelaren titulardunen laguntzaileek, bidaia doan
Orain arte, Mugiren titularrak ziren pertsona itsu eta gurpil aulkiaren erabiltzaileek bakarrik zuten laguntzaile batekin doan bidaiatzeko eskubidea.
Mugi txartelaren titularrak izanik menpekotasun egiaztagiria duten pertsonen laguntzaileek doan bidaiatuko dute. Menpekotasuna egiaztatuta duten Mugi txartelaren titularrek kosturik gabe lagunduta bidaiatzeko eskubidea izango dute. Orain arte, Mugiren titularrak ziren pertsona itsu eta gurpil aulkiaren erabiltzaileek bakarrik zuten laguntzaile batekin doan bidaiatzeko eskubidea. Garraioaren Lurralde Agintaritzak gaur goizean onartu du gehiengoz, eta hortaz, laguntza berezia izango dute Gipuzkoako Foru Aldundiaren mendetasun egiaztagiria duten Mugi txartelaren titularrek, beraiekin bidaiatzen duten pertsonek ez baitute txartela ordaindu beharrik izango.
Gisa horretako doakotasuna 2014an onartu zuten, baina soilik itsuen laguntzaileei eta gurpildun aulkien erabiltzaileei ezartzeko. Orain mendetasun egoera guztietara zabalduko dute. Erabakia hartuta, araudian aldaketa egingo dute, menpekotasuna duten pertsonek berek egiaztatu ahal izan dezaten doan bidaiatzeko eskubidea, identifikazio zehatza aurkeztuta. Agiri hori, Gizarte Politiketako departamentuak emango du, eta jakinarazi duenez, lanean ari dira jada garatzeko.
50.000 gipuzkoarrek dute gaur gaurkoz aniztasun funtzionala, eta horietatik erdiak du menpekotasunaren balorazioa egina aldundiak emandako datuen arabera, “baliteke laguntzailea eskatzea”. Gipuzkoako Garraio Agintaritzaren presidente Pedro Marcoren hitzetan, “albiste bikaina da menpekotasuna dutelako lagunduta joan behar duten pertsona guztientzat, menpekotasun hori agerikoa izan edo ez”.
Onartu berria den neurria noiz izango den indarrean ez dute jakinarazi.
Deskontuak urte amaiera arte indarrean
Gipuzkoako garraio publikoaren tarifen gainean aurreikusitako %50eko deskontuak urte amaiera arte luzatzea onartu dute, bestalde. Hilaren 6an egindako azterketaren emaitzen arabera, 2022ko lehen bost hilabeteekin alderatuta, %19 igo da garraio publikoaren erabilera.
