Sanferminetako barrakek trafikoa desbideratuko dute
Larunbatetik uztailaren 10era bitarte ezingo da Luzuriagako aparkalekuko gunean aparkatu, baina badira alternatibak. Ez da aldaketa bakarra izango.
Datorren astean abiatuko diren San Fermin Jaietako ferien muntaketak trafiko mozketak eragingo ditu asteburu honetatik. Udalak jakinarazi berri duenez, larunbatetik uztailaren 10era bitarte ezingo da Luzuriagako aparkalekuko gunean aparkatu. Alternatiba gisa, uztailaren 6tik aurrera, futbol txapelketa bukatu ondoren, Usozeko zelaiko kirol eremuan ahalko da autoa utzi. Barrakarik gabe libre geratzen den eremua bertakoentzat izango da soilik.
Ez da aldaketa bakarra izango. Uztailaren 5etik 10eko 7:00ak arte, Hamarretxeta, Zumakalarregi, Oarso eta Gure Zumardia kaleak ere itxiko dituzte. Herriko sarrerak ohikoak Eskalantegi eta Oarsoko zubia izango dira, baina trafiko perimetrala jarriko dute kale hauetatik: Eskalantegi, Luzuriagako aparkalekuaren perimetrala eta Gelasio Aranburu. Aurten, gainera, Nafarroa etorbidea, Gelasio Aranburu eta Blas de Lezo ere sarbide izango dira (noizbehinka mozketak egingo dituzte).
Herritik ateratzeko, Papineko bidetik edo Luzuriaga-Gelasio eta Aranburu-Oarsoko biribilgunetik jo beharko dute herritarrek.
Halere, uztailaren 5, 6, 7 eta 8an, 22:30etik aurrera (7:00ak arte) Papineko bidetik barrena atera beharko da nahitaez. Tarte honetan ere Ibaiondoko biribilgunea itxiko dute, eta Eskalantegitik sartu beharko dira autoak barrutira, gauez Papingo bidea irteteko soilik erabili ahal izango delako.
Informazio gehiago jaso nahi dutenez 943 9 43 00 telefono zenbakira deitu dezakete.
