Konpetizioa eta formazioa, arrosen erronkak aurten
KAE1 eta KAE2 ligetan ‘Erreka’ bana izango ditu San Juanek aurten. Traineru nagusiaren helburua, zalantzarik gabe, play offetarako sailkatzea da. Bigarreneko kirolariena, ikastea.
Bi traineru, eta bi helburu oso ezberdin. KAE1 eta KAE2 ligetan traineruak izango ditu aurten San Juan-Koxtape Arraun Elkarteak, biak gizonenak beraz. Erreka nagusiaren helburua, tapakirik gabe, Eusko Labelera iristeko baliagarri izan daitezkeen lehen bi plazetan izatea da. Bigarren Erreka-ko arraunlariena, berriz, ikastea eta formatzea.
KAE1en lau estropada eginak ditu jada San Juanek. Lehena irabazi zuten, Donibane Lohizunen. Handik aurrera beharbada banderaren aldeko borrokan ez, baina aurrean erregular izan dira. Play offetarako bi postu horien borrokan San Pedro, Lapurdi, Arkote eta Zumaia dituzte bidaide. «Bagaude bost talde bi plaza horien bila. Lehia polita izango da», nabarmendu du Endika Zaldua entrenatzaileak.
A taldeak iazko bizkarrezurra mantendu du. Inportantea da hori traineru baten garapenerako. Iaz hasitako ibilbidea, beraz, aurten indartzea dute helburu arrosek. Gainera, lehia historikoarekin: «Neguan ikusten genuen udara eder joango zela. Hau da, San Pedrorekin lehia historiko hori berraktibatzea polita izango da». KAE1eko azken estropada, hamabosgarrena, abuztuaren 20an izango dute Bilbon. «Gure asmoa denboraldia ahalik eta gehien luzatzea da», azaldu du Zalduak, umorez.
Urko Kortajarena da B ontziaren entrenatzailea. Haren esperientzia arraunlarien artean zabaltzeko lanean ari da. KAE2ko lehen estropada joan den asteburuan izan zuten Mutrikun, eta azkena izan zen Erreka. «Ontziko hamalau arraunlarietatik 11k 20 urtetik behera zituzten. Inork ez ditu hainbeste gazte traineruan. Hori oso kontuan hartu behar da. Gure helburua arraunlariak formatzea da, baina behin uretan izanda, lana ahalik eta txukunen egiten saiatuko gara».
Arraunkera eta bestelako alor teknikoak lantzen ari da Kortajarena gazteenekin. Baina arlo emozionala ere kontuan hartu behar dela dio: «Iaz Gazte Mailan estropada asko irabazitakoak daude traineruan. Ez dute atzean izateko ohiturarik. Arlo emozional hori ere landu behar da». Potentzial handiko kirolariekin ari dela uste du Kortajarenak. «Baina gazteak izanik, ikastea dagokie. Estropada guztietan ikasi behar dute, eta ahal bada, emaitzak hobetzen joan».
