Donibaneko mendiaren hegaletik doan pasealekuaren "utzikeria" salatu du Eguzkik
Bonantza auzoaren parean dagoen hormatxoa erdi erorita dagoela salatu dute, eta eragin ditzakeen kalteekin kezkati daude. Urtarrileko lanak "bortitzegiak" izan zirela diote.
Udalean aurkeztu berri duten salaketa publiko egin nahi izan du Eguzki talde ekologistak. Hedabideei bidalitako ohar batean azaldu dutenez, Pasai Donibaneko mendiaren hegaletik igarotzen den oinezkoentzako pasealekuaren egoerarekin kezkati daude. Zehazki, Santa Ana ermitaren bidearen eta Larrabide auzorako igoeraren bidegurutzean dagoen zatiaren “utzikeria” salatu dute. Egoera hori ez dela berria diote, “aspalditik” baitator haien ustez.
Bestak beste, Bonantza auzoaren parean dagoen hormatxoaz ari dira ekologistak (erreginaren eserlekua bezala ezaguna dena). Bertan ikus daitezkeenez, erdi erorita dago, eta erortzeko arrisku handia duela diote. Gogorarazi dute urtarrilean sastrakak kentzeko eta mozteko lanak egin zituztela, eta horiek “bortitzegiak” izan zirela salatu dute: “aipatutako hormatxoaren egoerari eta alboko pistari eragin ziezaioketen”. Horrez gain, balizko lur jausiak eta “ustekabeko ondorioak” ere izan daitezkeela diote kezkati, “bai materialak eta baita pertsonalak ere”.
Bestalde, Santa Ana baselizaren inguruan(erromesen aterpetxearen parean) barandaren zorurako finkapenak aske daudela diote, “modu arriskutsuan kulunkatzen ari direla eta leku horretatik igarotzen den oinezkoen ibilbideko erabiltzaileentzat arrisku argia eragiten dutela”.
Pasealekuaren egoera “udalaren mantentze faltaren eta utzikeriaren ondorioa” dela esan dute, eta “berehala” zuzentzeko eskatu diote udalari. “Baikorrak izan nahi dugu eta sortu den udalbatza berriari aukera bat eman nahi diogu. Lan horiei ekingo dietela espero dugu, baina arrazoizko epe batean jarrera aldaketa hori atzematen ez badugu, salatzen jarraituko dugu”, erantsi dute.
