[Irudiekin] "Hartu al duzu Leclercen maillotik?"
Maillot horia janzteko moduko harrera egin dio Errenteria-Oreretak Tourrari. Ziztu bizian pasatu da lasterketa, baina horrek ez du ilusiorik apaldu.
Laurent Pichon pasatu da lehenengoa Errenteria-Oreretan. Euskal Herriak Tourraren Irteera Handia jaso du egunotan, eta handia adjektiboa jartzearena motz gera daiteke. Euskal Herriak harrera erraldoia egin dio munduko txirrindularitza lasterketarik garrantzitsuenari.
Errenteria-Oreretako erdigunetik gaur eguerdian pasatu da, normalean hutsik egoten den momentu batean: astelehen bateko eguerdian. Renferen geltokitik Larzabaleraino bitartean pasatu da lasterketa, 16:00ak pasatxo zirenean.
Tourraren karabana lasterketa baino pare bat ordu lehenago pasatu da. Zaleak hasi dira furgonetetara hurbiltzen: Leclerc supermerkatu katearen maillotak eta txanoak izan dira egunotan altxorrik preziatuenak, baina Krys optika-denden ahateak ehizatzeko txano urdinak nagusitu dira gaur.
Bestela, askotariko merchandisinga jasotzeko aukera izan dute: Sud Ouest egunkariaren edizio berezia, higiezin agentziaren baten giltzatakoa… Eta kuriosoena: jendarmeriaren logoa duen giltzatakoa. Agian erreklutatzeko behar gorrian daude, eta beraien mugetatik harago bilatu nahi dute harrobia.
Materialaren gosez zeuden batzuek arpilatze ederra egin dute, beste asko esku hutsik joan direnean. Aspaldiko Tourretan bide-ertzean egondakoek bat egiten zuten gauza batean: lehen opari gehiago banatzen zituzten.
Karabanaren opariak jasota, batzuek etxerako bidea hartu dute, asebeteta. Jarraitzaile sutsuenek, berriz, ordu eta erdi inguruko tartea bete behar izan dute.
Batzuk bide-ertzean geratu dira, zain; egon da etxetik eserlekuren bat eraman duenik. Beste batzuek, zumardiko terrazetan arindu dute itxaronaldia. Bitartean, ibilgailuak pasa eta pasa aritu dira, eta zumardi parean geratu da Boutique officielle idatzita zeraman furgoneta beltza.
Jende saldoa korrika hurbildu da. Baina ez, haiek ez zuten doako ezer banatzen. Furgonetako saltzaileak “euro” hitza aipatu duenean uxatu ditu gehienak. Meritua du, gero, etapa guztia atzera begira egiteak.
Lasterketarako atzera kontaketa
Tourra bere udalerritik pasatzen dela aprobetxatu dute askok lasterketa ikusteko, eguneroko gauzetatik ihesaldia eginez. Beste batzuek, bigarren edo hirugarren etapa zuten; horiek erregulartasunaren maillot berderako borrokan aritu dira.
Mendiko sailkapenaren lidergoan, berriz, asteburua Jaizkibelen pasatu duten kuadrillatxo bat ikus zitekeen. Borrokalarienen dortsal gorria lortzeko, berriz, lehia —sanoa, betiere— egon da Euskal Herriak erabaki lelodun ikurrina zeramatenen eta Santa Klara plazako biribilgunean pentsioak igotzea eskatzen zuten Duintasunako kuadrillakoen artean.
Irrati transistore edo mugikorrean lasterketa jarraitzen zutenek ingurukoei lasterketa nola zihoan azaltzen zieten. Orain Zumaian, orain Igeldon, orain Donostian, orain Mirakruz gainean… Helikopteroak salatzen zuten lasterketa hurbil zela, eta polizien —Bidasoaren bi aldeetakoak— motorren abiadak txirrindulariei urratu diete bidea.
Arkea taldeko Laurent Pichon pasatu da lasterketa buruan, eta errepidearen bi aldeetan bildutako zaleen txalo zaparrada izugarria jaso du. Minutu eta pikura pasatu da tropela, ziztu bizian, luze-luze eginda; haiek ere jaso dute merezitakoa.
Lapurdin usakume bat bezala ehizatu dute iheslaria, eta esprintean bukatu da etapa. Jasper Philipsen flandriarrak lortu du Baionako helmugan azkarrena izatea.
Adam Yatesek jarraitzen du sailkapen nagusiaren buruan. Hala ere, egunotan maillot horia soinean janzteko merituak izan dituztenak bide bazterretik txirrindulariak animatu dituzten zaletuak izan dira.
