Batzar Nagusiak Oiartzunen izan dira, estreinakoz 1876tik
Urtero, uztailaren 2arekin, Batzar Nagusien pleno ibiltaria egiten dute. Aurten Oiartzuni egokitu zaio; alkateak harrera egin die.
Ezkerretik hasita, Eider Mendoza ahaldun nagusia, Xabier Ezeizabarrena batzar nagusietako presidentea eta Joana Mendiburu Oiartzungo alkatea. 1979ko uztailaren 2an berreskuratu zituzten Gipuzkoako Batzar Nagusiak, mende baten ondoren. Orduan erabaki zuten egoitza finkoa izatea. Aurretik, ibiltariak ziren batzar nagusiak.
Lehengo ohiturari aitortza egiteko asmoarekin, zein urteurrena ospatzeko helburuarekin, Batzar Nagusien Pleno Ibiltaria egin zuten atzo, Oiartzunen.
Joana Mendiburu herriko alkateak harrera egin zien batzarkideei, udaletxean, 09:30ean. Herriko aginte-makila eman zion Xabier Ezeizabarrena batzar nagusietako presidenteari. Agurra dantzatu zieten bi dantzarik, eta pleno aretora igo ziren batzarkideak eta zinegotziak.
Mendiburuk hitza hartu zuen, eta gogorarazi zuen Oiartzunen izan zen azkeneko plenoa 1876an izan zela. “Euskaldunoi, gipuzkoarroi, gure eskubide historikoak, foruak, kendu zizkiguten urtean”, zehaztu zuen. Halaber, aitortu zuen “ohorea” zela beretzat harrera egitea.
Horrez gain, Oiartzungo alkateak beste pasarte historiko bati egin zion erreferentzia: 1936an herriko zinegotziak kendu eta haietako bi —Leoncio Aranburu eta Antonio Irigoien— fusilatzeari. Atzera begiratzeari garrantzia eman zion, “non gauden” kokatzeko eta etorkizunari “aurrez aurre begiratzeko”.
Datozen erronkei “molde berriz” erantzun behar zaiela aldarrikatu zuen, eta pertsonen zaintza politiken erdigunera eraman behar dela, “guztion artean” aurrera eramateko, eta ez —”orain arte bezala”— emakumeen bizkar utzita.
Pleno ibiltaria 2046an bueltatuko da Oiartzunera. “Ordurako gu ez gara hemen egongo eta lekukoa hartua izango digute belaunaldi berriek. Utz diezaiegun ortzadarraren koloreak dituen lekuko bat, herrialde orekatu eta jasangarri baten ikurra dena eta euskaraz hitz egiten duena”, esan zuen alkateak.
Mendibururen hitzartzearen ondoren, Ezeizabarrenaren txanda izan zen. XII. agintaldia Gipuzkoa eta Euskal Herria “politika aurreratuen” hartzaile izan daitezela eskatu du.
Hurrengo batzar ibiltaria finkatu zuten: Arrasaten izango da, 2024ko uztailaren 2an.
