"Inoiz baino garrantzitsuagoa da politika feministak aldarrikatzea"
Oiartzungo Feministen Asanbladak deituta, elkarretaratzea egin dute, Zhen Jiangen hilketa matxista salatzeko. Laugarren hildakoa da zortzi astetan.
Elkarretaratzea herriko plazan egin zuten, atzo arratsean. “Euskal Herria sutan dago. 8 astetan, 4 hilketa matxista. Azkena, larunbatean, uztailak 1, Iruñean”. Oiartzungo Feministen Asanbladak deituta, elkarretaratzea egin zuten atzo arratsean Done Eztebe plazan, Zhen Jiangen hilketa matxistagatik amorrua adierazteko; esaldi horrekin hasi zuten irakurketa.
Mugimendu feministak bere samina eta elkartasuna adierazi nahi izan zien Jiangen lau seme-alaba, lagun eta gertukoei. 51 urteko bikotekideak hil zuen, labankadaka, pasa den larunbatean.
“Nazkatuta” daudela aldarrikatu zuten. “Gizartearen antolaketa patriarkalak uneoro indarkeria matxista gure artean egotea ahalbidetzen du, bai erakundeetan, bai kalean eta baita ingurune hurbilenean ere”.
“Soilenetik indartsuenera”, egunerokoan emakumeek ehunka eraso jasotzen dituztela salatu zuten. Arazoa “egiturazkoa” dela seinalatu zuten, “sistema heteropatriarkalaren ondorio”, eta argi dute ez dela etengo matxismoarekin bukatu arte.
“Euskal Herriko Mugimendu Feministatik indarkeriarik, arrazakeriarik eta gorrotorik gabeko bizitza izateko eskubidea aldarrikatzen jarraituko dugu”, iragarri zuten.
“Bizitza bizigarriak”
Gizartea “errotik” aldatzeko bidea feminismoa dela aldarrikatu zuten. “Eskuina aurrera egiten ari den garai honetan, inoiz baino garrantzitsuagoa da politika feministak aldarrikatzea, bai erakundeetatik, bai herri-mugimendutik; lortutako guztiari balioa ematea eta atzerapausorik ez onartzea”.
Pertsona guztiek “bizitza bizigarriak bizitzeko” eskubidea dutela nabarmendu zuten, jatorria, sexua edo gizarte-egoera zein dela ere. “Premiaz aldarrikatzen ditugu indarkeriarik gabeko bizitzak, bizitza duinak”.
Sistema “irauli” arte “borrokan” jarraituko dutela jakinarazi zuten, “feminismoak sistema patriarkala suntsitu arte”.
