Elkartasunez bustiko dira
Araba, Bizkai eta Gipuzkoako 2.700 herritarrek dute gaixotasuna, Gipuzkoan 750 herritar dira kaltetuak. Esklerosi anizkoitzak batez ere 18 eta 35 urte arteko gazteei eragiten dien gaitz neurologiko kroniko eta ezgaitzailea da.
Errehabilitazioak garrantzia handia du esklerosi anizkoitza duten gaixoen bizi kalitatea hobetzeko. Busti Zaitez Esklerosi Anizkoitzari aurre egiteko kanpaina egingo dute igandean Errenteria-Oreretan. Ekintza solidarioa da Busti Zaitez, eta milaka lagunek hartzen dute parte urtero gaixotasuna sufritzen duten pertsonei sinbolikoki laguntzeko igeri eginez. Bustitzen diren guztiek egiaztagiria jasotzen dute, eta egunaren amaieran herri guztietan igeri egindako metro guztiak batzen dituzte. Helburua gizartea sentsibilizatzea eta informatzea da gaixotasun neurologiko horrek eragiten dituen ondorioen inguruan, baita elkartearen jarduna sustatzeko diruz laguntzea ere.
Arrazoi ugari dago igandean bustitzeko. Araba, Bizkai eta Gipuzkoako 2.700 herritarrek dute gaixotasuna, Gipuzkoan 750, eta Espainiako Estatuan, 55.000 dira kaltetuak. Esklerosi anizkoitzak batez ere 18 eta 35 urte arteko gazteei eragiten dien gaitz neurologiko kroniko eta ezgaitzailea da. Esklerosi anizkoitzaren zergatia oraindik ezezaguna da. Ez dira horiek arrazoi bakarrak ADEMGI elkartearen arabera “bustitzeko”, haiek azaldu dutenez, zirkulazio istripuen ondoren, pertsona heldu gazteen desgaitasunaren bigarren arrazoia da esklerosi anizkoitza. Iniziatiban parte hartuta elkarteak beharrezkoak dituen baliabide ekonomikoak eta materialak lortzen lagunduko diote: “Gaixotasuna duten pertsonei eskaintzen zaizkien errehabilitazio zerbitzuak finantzatzeko eta beren bizi kalitatea hobetzeko”.
Errenteria-Oreretako kanpainan parte hartu nahi dutenek, hilaren 9an, igandea, Fanderiako igerilekuan egongo den postura gerturatu beharko dute. Igeri egiteaz gain, Katuki Saguyakik ekitaldi honetarako diseinatutako merchandising produktuak erosteko aukera izango da elkartea diruz laguntzeko. Beste modu bat laguntza egiteko, bertan dohaintza egitea izango da.
