Myriam Perez Cazabonen 'Nunavut', ostiralean Landetxen
Dantza garaikidea, soinu artea, arte plastikoak eta ipuin kontaketak uztartzen ditu Neri(h)ari konpainiaren dantza ikuskizunak.
Dantza emanaldia ikusteko aukera izango da ostiral —hilak 7— arratsean, 20:ooetatik aurrera. Myriam Perez Cazabonen ideia oinarri duen Nunavut pieza eskainiko dute.
Landetxen izango da emanaldia, baina ez areto barruan: sarreraren parean dagoen plazatxoan emango du Neri(h)ari konpainiak. Doakoa izango da saioa.
Dantza garaikidea, soinu artea, arte plastikoak eta ipuin kontaketak batzen ditu Perez Cazabonek zuzentzen duen lanak.
Pasa den hilean estreinatu zuten, Donostian, Nunavut ikuskizuna. Hitz horrek “gure indarra” edo “gure lurra” esan nahi du inuiten hizkuntzan. Dantzari oiartzuarrak zuzentzen duen piezak 55 minutuko iraupena izango du, eta bidai oniriko bat proposatzen duela iragarri dute [informazio gehiago, beraien webgunean].
Sinopsia
Noiz utzi genion haur izateari? Noizbait utzi al diogu? Noizbait utziko al diogu?
NUNAVUT behin izan gineneko lurraldea da, denbora izozturik mantentzen denekoa, glaziarrek betirako irauten dutenekoa.
Bertan ikasi genuen zuhaitzetatik zintzilika ibiltzen, zuhaitzik gabeko eremuan. Bertan jaso genuen piztiaren besarkada. Bertan ziren aske, haizeak korapilaturiko gure adatsak.
Ahazturatik berreskuratuko al dugu, noizbehinka, bertara itzultzeko bidea…?
NUNAVUTek “gure indarra” edo “gure lurra” esan nahi du Inuiten hizkuntzan. Lurralde utopiko bat eraikitzeko saiakera da, non maitasuna, munstroak eta jolasa nagusi diren. Non dena geldi dagoen, eta begiratzea eta entzutea besterik ez den geratzen. Ondoren, guztia gertatzen da…
