Portu Agintaritzako eta udal gobernuko ordezkari berriek lehen bilera egin dute
Bilera "adeitsua" izan dela diote udaleko iturriek. "Elkar ezagutzeko eta Pasaiako badiaren etorkizunerako erronkak eta helburuak mahai gainean jartzeko" probestu dute bilkura.
Atzo egin zuten lehen bilera. Atzo goizean (hilak 4), Pasaiako Portuko Agintaritzaren lehendakari eta zuzendari Jokin Telleria eta David Candelario Pasaiako udaletxean izan ziren, Teo Alberro alkate berriarekin eta Iraitz Pazos zinegotziarekin batera lehen bilera egin zuten. Bilera “adeitsua” izan dela diote udaleko iturriek, “elkar ezagutzeko eta Pasaiako badiaren etorkizunerako erronkak eta helburuak mahai gainean jartzeko” probestu zuten bilkura.
Bi erakundeek ondorioztatu dute portuaren eta hiriaren arteko harremana hobetzen jarraitzeko urratsak egiteko premia dagoela, “elkar ulertzetik abiatuta”.
Bigarren bilera bat egitea adostu zuten atzokoan, hil honen bukaeran egingo dutela jakinarazi dute, “Pasaiak dituen erronkak partekatu eta horiei nola ekin aztertzeko” asmoz.
