Guardia izango da arerio Euskal Herriko Herriarteko finalerdietan
Oiartzungo esku huskako pilotariek iazko balentria errepikatzen hasteko data badakite: hilaren 15ean, Zumarragan. Arabako txapeldunak izango dituzte zain.
Pilotari oiartzuarrak, Gipuzkoako Herriartekoaren finalaren aurreko argazkiak. Oiartzunek esku huskako Herriarteko Txapelketa irabazi zuen ekainaren 24an, eta modu horretan, Euskal Herriko txapelketara joateko txartela lortu zuen.
Hurrengo asteburuan jokatuko dituzte finalerdiak. Oiartzuarrek badakite nor izango duten arerio: Guardia. Arabako txapeldunen kontrako partida hilaren 15ean —larunbata— izango da, Zumarragako Beloki pilotalekuan. Lehen finalerdi hori 11:00etan hasiko da.
Bigarren finalerdia igande horretan —hilak 16— jokatuko dute. Markina-Xemein da Bizkaiko txapelduna, eta Nafarroakoa oraindik erabakitzeke dago. Izan ere, uztailaren 1ean jokatu behar zituzten Larraun eta Iruñearen arteko partidak.
Hala ere, atzeratu egin zituzten partida horiek, iruindarren pilotariren batek irregularki jokatu ote zuelakoan. Finalerdia berriro errepikatu behar dute hiriburukoek, pilotari hori gabe.
Gipuzkoakoan, Oiartzunek Azpeitia garaitu zuen, iaz bezala. Kadeteen partida galdu arren, beste biak irabazi zituen. 2022ko Euskal Herriko Herriarteko txapeldunak izan ziren, halaber, oiartzuarrak.
