Pasaia Kayak taldekoek asteburu biribila izan dute
Candasen (Asturias) izan ziren joan den asteburuan, bertan jokatutako itsas kayakeko Espainiako III. Kopan. Dominaz beteta itzuli dira.
Asteburu “biribila” izan dute Pasaia Kayak taldeko kirolariek. Candasen (Asturias) izan ziren joan den asteburuan, bertan jokatutako itsas kayakeko Espainiako III. Kopan. Emaitza bikainak lortu dituzte pasaitarrek.
Kategoria nagusikoek Bañuegues eta Candas arteko 15 kilometroko ibilbide gogorrari egin behar izan zioten aurre, bakarka, itsaso nahasi eta zakar samarrarekin. Aritz Aranetak ordezkatu zuen kluba seinor kategoria gorenean. Lan bikaina egin zuen, eta meritu handiko 9. postuan bukatu zuen lehia, 1:06:46ko denborarekin. Gainerako kategorietan ohorezko postuak eskuratu zituzten klubekoek, eta nabarmentzekoa da Lander Rodriguez sanpedrotarraren garaipena beteranoetan, klubaren lehen urrea lortuz. Beste bi domina ere ekarri dituzte Pasaiara nagusiek, hain zuzen, Iñaki Fernandezek eta Txema Yarzak, zilarrezkoak biak.
Candasko portuaren inguru horretan ere jokatuko zuten bigarren jardunaldia. Iker Lizaso ibarratarrak eta Maialen Vitoria altzatarrak osatutako K2 m mistoak urrezko domina poltsikoratu zuen, 8.000 metroko ibilbidea 38 minutu eta 32 segundoko denboran burutuz. Ioar eta Oinatz Alonso anai-arrebek brontzezko domina zintzilikatu zuten kadete eta haur kategorietan, lan oso txukuna egin baitzuen bikoteak. Eta azken dominak, kasu honetan brontzezkoak, Vega eta Yarza beteranoek eskuratu zituzten.
Beteranoen lana nabarmendu nahi izan du klubak, taldekako sailkapenean hirugarren postua lortu baitute, inoiz talde pasaitarrak lortu duen sailkapenik onena Espainiako Kopa batean.
Azkenik, klubeko hiru kirolarik (Aitor Arrieta, Ion Carballo eta Iñigo Lois) Euskal Selekzioarekin izan ziren,eta 5. eta 6. postuak eskuratu zituzten.
