[Irudiekin] Sanferminetako Euskal Jaia erraldoia izaten ari da
Antxotarrak festen kargagailuko laugarren bala ari dira gastatzen. Eguerdian erraldoien eta Topaguneko jolasen txanda izan da.
Biteri plazan giro polita jarri dute, Topaguneak antolatutako jolasetan. Sanferminetako hirugarren goizean Antxo berandu esnatu da. Izan ere, goizeko lehen orduetan gaupasero-enak izan dira barrutiko kaleak. Euskal Jaiaren eguna da gaurkoa.
Goizean galeperren tiraketa eta toka txapelketa jokatu dituzte, nagiak nagusi diren orduetan. Eguerditik aurrera hasi gehiago animatzen. Terrazetako mahaiak pixkanaka betetzen hasi dira, baina hori ia astebururoko kontua da: festak dira, eta ospatu egin behar dira.
Topaguneak, Biteri plazako erbestean, familientzako jolasak antolatu ditu. Lau taldek hartu dute parte: Saltxitxillak, Fermintxo, Antxotikanen eta Xaxorda. Gerora tokian bertan antolatu duten bazkariko paellaren keak girotu du jolasaldia.
Denboraren lema modu irmoan heldu duen eta dezibelioetan gorabeherarik izan ez duen speakerrak gidatuta, hainbat jolasekin dibertitzeko aukera izan dute: sokatira, zaku-saltoka, arrautzen kaxak pilotekin betetzea…
Azkenean, hamabi lagunentzako afaria irabazi dutenak Saltxitxillak izan dira. Espero da menua beraien izenak adierazten duena baino oparoagoa izatea.
Jolasak egiten ziren bitartean, barrutiko kaleetatik ibili dira erraldoi eta buruhandiak, Antxo girotzen. Parrandazaleek gaur izango dute azkeneko bala; egunez gozatzea gustuko dutenek oraindik biharko ere geratzen zaie. Hau da geratzen diren ekitaldiak:
Gaur, hilak 8
- 17:00 Skate txapelketa, Kampsan.
- 17:00 Helduen danborrada, igoera Berrara.
- 19:00 Bertsolariak (Alaia Martin, Amets Arzallus, Andoni Egaña, Nerea Ibarzabal, Mimos tabernan.
- 20:30 Basariko danborrada.
- 21:00 Tekno gaua, Kampsan.
- 23:00/06:00 DJ, Mimos tabernan.
- 23:00 Borrokaren doinuak: Txapel Punk + Kaos etiliko, Papinen.
- 00:00/04:00 ZUTIK erromeria, Biteri plazan.
- 01:00 DJ Jalajabetei (Txita), Topagunean.
- 04:00 DJ Itzalpeko, Papinen.
Bihar, hilak 9
- 06:30 Diana.
- 10:00 Haur xake txapelketa, Biteri plazan.
- 11:00 Puzgarriak eta aparra, Biteri plazan.
- 11:00/18:00 Marmitako txapelketa, Galepertarren elkartean.
- 13:00 Erraldoiak eta buruhandiak dultzaineroekin.
- 13:00 Jotak “Voces Ribera”, Biteri plazan.
- 14:30 Haurren bazkaria, Biteri plazan.
- 15:00 Parrillada, Biteri plazan.
- 16:30/ 20:30 Oillaren gudua, Papinen.
- 17:30/19:30 “Dantzatzeko prest”, Biteri plazan.
- 18:00/22:00 Tardeo DJ, Mimos tabernan.
- 19:30 Txokolatada, Topagunean.
- 23:30 Zezensuzkoa, Biteri plazan.
- 00:00 Gaixoa ni, Biteri plazan.
